Tussenverkiesing: kandidate bekend gemaak
Vier kandidate wat die munisipale Wyk 13 se vakante setel gaan beveg, se name is bekend.
Kiesers in Oudtshoorn se munisipale wyk 13 gaan op Woensdag 30 Mei weer terug stembus toe. Die tussenverkiesing vind plaas na die afsterwe van DA-raadslid Pieter Luiters.
Macellis Theyse (DA), Romeo Prins (EFF), Micheal Wagenaar (ANC) en Daniel Oppels (ACDP) is sover bekend vier van die kandidate wat vir hul onderskeie partye wyle Luiters se setel gaan beveg.
Courtney Sampson, die Wes-Kaapse onafhanklike verkiesingskommissie (OVK) se verkiesingshoof, het Woensdag gesê die inskrywing van kandidate het gesluit. “Die kandidate se besonderhede word nou deur die OVK nagegaan. Ons behoort teen Maandag 14 Mei te weet wie hulle is.”
Die DA-, EFF-, ANC- en ACDP-kandidate se name is deur hul onderskeie politieke partye aan die Oudtshoorn
Courant bekend gemaak. Volgens LP Tertuis Simmers, DA-verkiesingshoof en woordvoerder vir die tussenverkiesing, het gesê, “stemwerwing het reeds begin en die kiesersrol vir die tussenverkiesing is op Saterdag 3 Mei afgeteken.
Die speaker van die raad, Julia le Roux Krowitz, het Maandagoggend gesê: “Volgens my kennis gaan Sarco ook deelneem aan die verkiesing.”
Die Oudtshoorn Courant kon nie van Sarco bevestiging kry oor of hulle wel gaan deelneem nie.
Die stemlokale vir die tussenverkiesing is St. Simons Kerk en die Bridgtonvakansieoord.
Ongeveer 3 700 kiesers het geregistreer om hul kruisie te trek.