TWEE MIL JOEN liter water per dag weg
Inwoners van Oudtshoorn is woedend nadat die munisipaliteit Woensdag bekend gemaak het dat hulle reeds vir meer as 'n maand weet dat die dorp kosbare water teen 'n tempo van ongeveer 83 000 liter per uur verloor. Die onrusbarende nuus oor 'n stukkende waterpyp by die Raubenheimerdam is Woensdag tydens
'n spesiale raadsvergadering aan die media bekend gemaak. Verdere rede tot kommer is dat die totale inhoud van die Raubenheimerdam binne twee dae sal verdwyn indien die pyp heeltemal sou bars. Die raad is Woensdag meegedeel dat dringende risikobestuur nou toegepas word terwyl bykans twee miljoen liter water per dag uit die stukkende pyp stroom.
Die reuselekkasie is in die hoofwatertoevoerpyp in 'n ondergrondse waterafvoerkanaal by die wal van die Raubenheimerdam.
Ten spyte van die feit dat die waterverlies reeds langer as 'n maand aan die departement tegniese dienste bekend is, is Oudtshoorniete nie daarvan in kennis gestel nie. Sonder om die lekkasie te verklaar is op 20 April slegs 'n kennisgewing uitgereik wat lees: "Kennis geskied hiermee dat waterbeperkings en droogtetariewe tot verdere kennisgewing geïmplementeer sal word, aangesien die gekombineerde watervlak van die Raubenheimerdam en Melvilledam minder as 50% is."
Inwoners het nie gehuiwer om hulle woede oor die weerhouding van hierdie uiters belangrike inligting op sosiale media te lug nie.
Die gort was ook in die raadsaal gaar toe raadslede Woensdag hoor dat die krisis reeds op 6 April bekend was, maar eers 'n maand later aan die raad oorgedra is.
Die direkteur tegniese dienste, Chris Koch, het verduidelik dat 'n geskikte kontrakteur, wat die standaard van werk kan doen, geïdentifiseer moes word. "In samewerking met Lyners Raadgewende Ingenieurs, moes ons die omvang van die skade bepaal en 'n behoeftebepaling doen, waarna 'n verslag aan die raad opgestel is."
“Indien die pyp meegee kan die dam, wat tans 38% vol is, binne twee dae leeg loop en Oudtshoorn sonder water laat.”
Die portefeuljeraadslid vir tegniese dienste, Johan Fourie, het die raad gevra om onmiddellik R3,5 miljoen beskikbaar te stel om die ramp te voorkom. Die geld sal aangewend word om 190 meter pyp binne die kanaal, vier kleppe en 20 meter staalpyp na die inloop van die kanaal te vervang.
Alhoewel die finansiering met 'n 12 DA teenoor agt ANC en Icosa stem goedgekeur is, het Koch en Fourie deurgeloop onder die opposisie se vrae.
Die opposisie wou die normale tenderprosedure sy gang laat gaan. Fourie het verduidelik dat daar teen tyd geveg word en dat 'n tenderproses van 90 dae rampspoedig kan wees.
Koch het die raad meegedeel dat alle beskadigde pype vanaf die Mellvilledam herstel is.
"Met aanvang van die werk aan die Raubenheimerdam se waterafvoer, sal water van die Mellvilledam na Oudtshoorn herlei word.
Die dam se waterinhoud is genoeg om die dorp vir 30 dae van water te voorsien."
Koch het aan die Oudtshoorn Courant gesê dat voorbereidingswerk om die pyp te vervang reeds vandag (1 Mei) sal begin. "Lyners Raadgewende Ingenieurs en Transand is Woensdag aangestel om die werk te doen."
Koch het Donderdag aan die Oudtshoorn
Courant verduidelik dat die water wat tans uit die pyp lek, in die Grobbelaarsrivier inloop. In antwoord op vrae oor hoekom die waterdruk nie saans verminder word, om water te spaar nie, het hy gesê: "Die reservoirs moet saans gevul word.
"Daar moet te alle tye genoegsaam water in die reservoirs wees om die dorp vir 48 uur van water te voorsien."
Lyners Raadgewende Ingenieurs en Transand is Woensdag aangestel om die werk
te doen.