Lamppaal stuit dief se jaagtog
‘n Motordief se jaagtog om van die polisie weg te kom is Dinsdagoggend deur ‘n lamppaal beëindig waarna die dief te voet gevlug het. Hy is ‘n ruk later naby Rademeyerstraat aangekeer waar hy langs die rivier weggekruip het.
Volgens Lodewyk Jonck wat in Oewersig woon, het hy Dinsdagoggend omstreeks 04:00 wakker geword van die dreuning van sy bakkie wat in die erf gestaan het. Hy het uitgegaan en gesien sy Isuzu-bakkie is weg.
“Ek het dadelik vir my vrou gesê sy moet die polisie bel, in my bakkie gespring en die diewe gaan soek.”
Hy het by die polisiestasie aangedoen en die diefstal aangemeld. Minute later is hy in kennis gestel dat die gesteelde bakkie in ‘n botsing by die kruising van Rademeyer- en Jan van Riebeeckstraat betrokke was. Hy het op die toneel aan die Oudtshoorn Courant van die ondervinding vertel.
Dit blyk dat ‘n patrollievoertuig die bakkie opgemerk het en dat die dief toe weggejaag het. Hy het homself misgis toe hy uit Rademeyerstraat in Jan van Riebeeckstraat indraai en het ‘n lamppaal morsaf gery. Hy het daarna op die vlug geslaan. Die bakkie se voorkant is beskadig en Jonck kon nog nie bevestig wat die koste van die skade is nie.
Sersant Gretchen Michaels, woordvoerder van die Oudtshoornpolisie, het bevestig dat die 30-jarige Lusama Kolisi Dinsdagoggend naby die rivier gearresteer is en Woensdag in die hof verskyn het op aanklag van voertuigdiefstal. Volgens haar het hy nie sy samewerking aan die polisie gegee nie en is dit nog nie bekend vanwaar hy kom nie.