Titus op R30 000 borgtog vrygelaat
Magdaleen Titus, die hoofverdagte in die Preston Titus-moordsaak, is Maandag borgtog van R30 000 in die hooggeregshof in Kaapstad toegestaan.
Dit is nie duidelik wanneer Titus appèl teen die weiering van haar borgtogaansoek aangeteken het nie.
Volgens Eric Ntabazalila, woordvoerder van die nasionale vervolgingsgesag, moet Titus Maandae, Woensdae en Vrydae by die Worcester-polisiestasie aanmeld. Sy mag ook nie die Wes-Kaap verlaat of naby internasionale vertrekpunte kom sonder skriftelike toestemming van die ondersoekbeampte nie en ook nie haar adres verander sonder skriftelike kennis nie. Sy mag ook nie kontak maak met staatsgetuies nie.
Titus is op 19 Januarie op aanklag van moord in hegtenis geneem na haar man, Preston, se liggaam die nag van 1/2 Desember in sy huis op die Weermagbasis gevind is. Hy is met verskeie steekwonde in sy huis gevind.
Sy is op 8 Maart borgtog in die Oudtshoorn-landdroshof geweier.
Landdros Errol Thomas het klem gelê op die feit dat die staat ‘n sterk prima facie saak het en dat daar geen buitengewone omstandighede is om haar op borgtog vry te laat nie.
Titus word saam met Natasha Stuurman, Sixabiso Klip, Justice Mooi en Masethembe January (MJ) vir moord aangekla.
MJ is op 11 April in hegtenis geneem en moet nog met sy borgtogaansoek voortgaan. Stuurman is op 9 April borgtog toegestaan. Mooi is vroeër borgtog geweier en Klip het skuldig gepleit en is reeds gevonnis.
Titus, Stuurman en Mooi se saak is tot 4 Junie vir verdere ondersoek uitgestel terwyl MJ se borgtogaansoek op 17 Mei voortgaan.