Indaba fokus op avontuurtoerisme

Die eerste indaba oor avontuurtoerisme in die Suid-Kaap word vir 26 en 27 Oktober in Wildernis beplan. Die Avontuurtoerisme Indaba en Ekspo word deur Alewijn Dippenaar van Thousand Sensations en Mimi Finestone van Goji PR & Events in Wildernis aan die Suid-Kaapse kus aangebied.

“Tydens die Vakantiebeurstoerismeskou in Utrecht, Nederland, in Januarie vanjaar het ons besef dat buitelandse toeriste na Suid-Afrika geen idee het hoeveel geleenthede vir avontuurtoerisme in die SuidKaap bestaan nie,” sê Dippenaar. Volgens hom is daar meer as 100 toerismebesighede wat fokus op avontuur vanaf Riversdal (wes) tot by Tsitsikamma (oos) en Prins Albert (noord). Toerisme-besighede wat fokus op avontuurervarings word genooi om deel te neem.

Die Indaba en binnenshuise uitstalling word Vrydag 26 Oktober by Wildernis Hotel aangebied. Gastehuise, restaurante en ander besighede in die gasvryheidsbedryf word ook genooi om insette te lewer tydens die Indaba. Die instansies kan ook deelneem aan ‘n binnenshuise uitstalling by die hotel.

Daar is plek vir ten minste 300 buiteluguitstallings wat verband hou met avontuurtoerisme op Bruce Jackson se plaas Woodifields op die bekende Kaart van Afrika in Wildernis.

Avontuurtoerisme sluit aktiwiteite in die lug, water en op land, en saam met diere in. “Sommige toeriste soek adrenalienbelaaide belewenisse, terwyl ander minder aktiewe deelname verkies. Hierdie gebied se verstommende verskeidenheid aktiwiteite bied hope geleenthede vir albei groepe om die asemrowende natuurskoon van die Suid-Kaap ten beste te ervaar.

Ons wil met die Indaba en uitstallings die Suid-Kaap as die mees gesogte avontuurtoerismebestemming in die wêreld vestig,” sê Dippenaar.

Vir verdere inligting kontak Alewijn Dippenaar by082 457 5675 en dyndev@mweb.co.za of Mimi Finestone by 084 583

3144 en mimi@gojipr.net.