Gimmie sport dag dié naweek
Langenhoven Gimnasium (Gimmies) sal hierdie naweek vir die sportdag teen Hoërskool Oudtshoorn (Struisies) gasheer speel.
Die sportdag vind jaarliks op ‘n rotasiebasis by die twee skole plaas. Die netbalwedstryde sal reeds vanmiddag (Vrydag 11 Mei) vanaf 14:00 plaasvind. Daar sal ook ‘n kermis saam met die netbalwedstryde wees.
Die rugby en hokkie begin Saterdag 12 Mei om 08:00
GIMMIES
Boodskap van mnr. Stephan Potgieter: Gimmies se skoolhoof:
Gimmies teen Struisies is altyd ‘n hoogtepunt op die kalender van die jaarlikse sportprogram. Gesonde kompetisie en sportmanskap is altyd ‘n kenmerk van hierdie dag.
As gasheerskool wil ons almal uitnooi om hierdie geleentheid by te woon, die netbal speel reeds Vrydagmiddag en Saterdag vind die hokkie en rugby plaas. Daar sal vanaf Vrydagmiddag heerlike kermisartikels te koop aangebied word.
Kom ondersteun asseblief die spelers en geniet beide dae by ons.
Ons wens elke span sterkte toe. Geniet julle spel en maak nuwe vriende. Onthou, gee jou beste, hou by die reëls en speel om dit te geniet.
Kapteins se boodskappe
Bennie Stemmet: Eersterugbyspan
Ons is slaggereed om teen Struisies deel te neem, en sien uit om in goeie gees kragte te meet.
Ilke van der Linde: Eerstenetbalspan
Ons sien baie uit om teen Struisies te speel want dit is definitief een van ons hoogtepunt van die jaar. Ons is baie goed voorberei en mag die beste span wen.
PW van Heerden: Eersteseunshokkiespan
Sterkte aan al die spanne wat die naweek
speel. Dit is altyd lekker om teen ons buurskool kragte te meet. Ons het hard gewerk, en is baie positief.
Helette du Plessis: Eerstedogtershokkiespan
Dit is altyd ‘n lekker uitdaging om teen ons buurskool kragte te meet. Ons is goed voorbereid en sien baie uit na die wedstryd.
STRUISIES
Boodskap van mnr. Coenie de Vos: Struisies se skoolhoof
Dit is elke jaar vir Hoërskool Oudtshoorn se sportspanne ‘n groot uitdaging om teen ons buurskool te kompeteer. Ons vertrou dat al die wedstryde in ‘n gees van gesonde sportmanskap sal plaasvind.
Baie dankie aan al die afrigters vir hulle positiewe gesindheid en lang ure in die son en wind ter voorbereiding van die spelers. Mag die beste spanne wen en onthou dat sport nie ‘n oorlog is nie.
Kapteins se boodskappe
Thomas Jordan: Eersterugbyspan
Ek het baie vertroue in my span. Dit is altyd lekker om teen jou buurskool te speel. Ons glo dit gaan ‘n harde wedstryd wees op Gim se velde, maar ons gaan ons beste gee en altyd goeie sportsman gees hê.
Gitte Roller: Eerstenetbalspan
Ons span sien baie uit na die naweek se wedstryd teen Gimmies. Die wedstryd is altyd baie intens en ‘n hoogtepunt in ons seisoen.
Reiner Cornelissen: Eersteseunshokkiespan
Ons is baie opgewonde oor die naweek se wedstryd en sien uit na die kompetisie wat ons buurskool vir ons gaan inhou. Ons speel nie net om te wen nie, maar ook om ons skool trots te maak.
Carla Swart: Eerstedogtershokkiespan
Ons sien baie uit na die naweek se wedstryd teen Gimmies. Dit is elke jaar ‘n hoogtepunt in ons seisoen om teen ons buurskool kragte te meet.
Mag die beste span wen.