Ouers soek steeds antwoorde
Die ouers van die vyf maande oue Meuglon Donson wat twee jaar gelede oorlede is na hy uit die sorg van sy ouers geneem is, soek steeds antwoorde.
Meuglon is op 29 September 2016 deur ‘n maatskaplike werker van sy ouers weggeneem en hy het twee maande later in pleegsorg gesterf.
Volgens die kind se ouers, Remeco Jacobs (23) en Patricia Donson (21), was Meuglon ‘n vroeggebore baba en is hulle oortuig daarvan dat hul kind weens nalatigheid van maatskaplike dienste gesterf het.
“Meuglon is op 19 Mei gebore. ‘n Familielid van Remeco het een aand met my kind na die polisiestasie gegaan en vir hulle gesê dat ons onbevoegde ouers is en dat hulle die kind moet wegvat. Sy was egter onder die invloed van drank gewees. Die polisie het ‘n maatskaplike werker laat kom en hulle het teruggegaan huis toe en met Remeco gepraat,” het Patricia Donson aan die Oudtshoorn
Courant vertel.
Volgens haar was die situasie opgelos, maar sy moes later uitvind dat haar kind deur die maatskaplike werker na ‘n pleegma geneem is.
“Maatskaplike dienste wou nie eers vir ons sê waar ons kind is nie. Hulle het vir Remeco gesê dat Meuglon net vir die naweek by die pleegouer sou wees.”
Volgens haar het hulle ‘n lang lys voorskrifte by die hospitaal gekry na Meuglon se vroeë geboorte om te verseker dat die baba korrek hanteer word.
“Ons het medikasie gekry wat ons vir hom moes gee en daar was ook sekere goed wat ons moes doen om seker te maak dat hy ‘n gesonde baba sal bly. Maatskaplike dienste het egter nooit die medikasie of die voorskrifte soos deur die hospitaal voorgeskryf, vir die pleegma gegee nie.” Die baba is twee maande nadat hy in pleegsorg geplaas is, dood.
Danie Maart ,‘ n gemeenskap s aktivis, het van die ouers se hartseer storie te hore gekom en ingegryp.
“Ek het met verskeie persone, insluitende die departement van maatskaplike dienste in kontak gekom en vir hulle vertel wat gebeur het. ‘n Forensiese deskundige wat in maatskaplike sake spesialiseer, het Oudtshoorn toe gekom om ‘n ondersoek te doen. Daar is gevind dat daar wel nalatigheid van maatskaplike dienste se kant af was.”
Volgens Maart was daar ‘n baie lang proses voor die maatskaplike werker uiteindelik aangekla is.
Die Oudtshoorn Courant het die naam van die maatskaplike werker, maar omdat die saak intern hanteer word, kan sy naam nie bekend gemaak word nie.
“Ons het aanvanklik nie geweet die verhoor het begin nie. Die maatskaplike werker het uiteindelik vir hom ‘n prokureur gekry en sover ons verstaan het, het hy skuldig gepleit. Wat ons egter baie ongelukkig maak is die feit dat ons geen verdere antwoorde uit maatskaplike dienste uit kry nie.”
Maart sê die familie wag al twee jaar om uit te vind wat die uitslag van die interne verhoor was en of die maatskaplike werker verantwoordelik gehou gaan word vir sy nalatigheid. Hy het ook gesê dat die familie nooit ‘n amptelike rede vir hul kind se dood gekry het nie.
Sihle Ngobese, woordvoerder van die minister van maatskaplike ontwikkeling, Albert Fritz, het die week gesê dat wanpraktyke in die voorval betrokke was, maar dat dit nie die rede vir Meuglon se dood is nie.
“Kinderbeskermingsgevalle is van nature vertroulik en daarom kan die departement nie feite oor die saak aan die media of derde partye bekend maak nie. Die interne tugproses is steeds aan die gang en daar sal binnekort ‘n uitslag wees. Omdat tugprosesse intern tussen die werkgewer en werknemer hanteer word, kan ons nie die bevindinge met die publiek deel nie.”
Hy het verder erken dat die voorval nie op die regte wyse hanteer is nie.