Plaas veiligheidstelsel vir boere
Die Kangovalleie Boerevereniging het pas ‘n plaas veiligheidstelsel saam met ‘n sekerheidsmaatskappy ,‘ n kommunikasie-net werkverskaffer en die polisie van stapel gestuur.
“In die lig van groeiende misdaad, insluitend plaasmoorde en die toenemende bedreiging van grondbesettings, het daar ‘n behoefte by lede van die vereniging ontstaan om ‘n vinnige, gewapende responsaksie in geval van nood in werking te stel,” het Theo Landman van Karusa-landgoed en voorsitter van die boerevereniging, verlede Donderdag tydens ‘n vergadering van lede in Schoemanshoek gesê.
Die vereniging het sowat 36 lede in ‘n gebied wat strek vanaf Oudtshoorn tot by Matjiesrivier.
Die plaas veiligheidstelsel ru sop drie bene, naamlik die net werkverskaffer J& E Communications, Metro City Protection Service (MCPS) se tak in Oudtshoorn, en die polisie se afdeling vir landelike beveiliging.
“Die doel van die stelsel is om boere op plase in die vyf areas met behulp van ‘n mobiele radiostelsel, wat met MCPS se kontrolekamer verbind is, in geval van nood by te staan,” het Landman verduidelik.
Wanneer ‘n noodoproep per radio by MCPS se operasionele sentrum ontvang word, word noodvoertuie onmiddellik geaktiveer. Direkte bure en die polisie se landelike beveiliging s afdeling word ook onmiddellik verwittig. Die noodvoertuie word beman deur gewapende, opgeleide en geregistreerde reaksiepersoneel, en in die geval van ‘n mediese noodgeval ‘n ten volle toegeruste ambulans met opgeleide mediese personeel.
Registrasie opdiep laas veiligheidstelsel is gratis, maar boere moet die radio’s aankoop, en indien nooddienste reageer op ‘n noodoproep, word ‘n eenmalige fooi gehef wat bereken word op die afstand wat die noodvoertuie moet aflê.
Die diens sal na verwagting teen einde Julie ten volle operasioneel wees en is slegs beskikbaar vir lede van Kangovalleie Boerevereniging. Dit kan later uitgebrei word na ander verenigings indien hulle belangstel.
Kontakbesonderhede
Kontak Rudi du Toit by 044 279 1772 of rudie@metrocityprotection.co.za of Theo Landman by 083 90 8332 of theo@karusa. co.za vir meer inligting.