Rou riool in gholbaandam
Rou riool stroom daagliks uit ‘n mangat en beland in ‘n dam by die Oudtshoorngholfklub. Die mangat is aan die onderkant van Oudtshoorn Korrektiewe dienste, enkele meters van die heining, geleë.
Die rioolprobleem is deur Christie Slabbert onder die Oudtshoorn Courant se aandag gebring. Volgens Slabbert het hy die riool probleem al met die Oudtshoorn munisipaliteit opgeneem .“Tot vandag is daar nog geen moeite gedoen om dit reg te stel nie.”
Die Oudtshoorn Courant en Slabbert het die loop van die rioolafloop gevolg en gevind dat dit in ‘n dam langs die 12de putjie op die Oudtshoorn-gholfbane invloei.
Die mangat wat die oorsprong van die afvloei is, is in ‘n dig beboste area naby die heining van die gevangenis terrein. Die volume water wat by die gat uitstroom het die ysterdeksel verskuif en menslike riool lê rondom die gat en in die stroom.
Johann Cornelissen, klubkaptein van die Oudtshoorn-gholfklub, het Woensdag gesê: “Ons is al lank bewus van die vuil water wat hier invloei, maar kon nooit die oorsprong vind nie. Ons gaan dit onmiddellik met die munisipaliteit opneem.”
Ntobeko Mangqwengqwe, woordvoerder van die Oudtshoorn-munisipaliteit, het Woensdag gesê: “Die departement tegniese dienste was nooit bewus van die probleem nie. Nou dat ons weet sal dit aandag geniet.”
Behalwe vir die riool is rommelstorting volgens Slabbert ook ‘n groot probleem. Hy het verskeie plekke in die veld uitgewys waar inwoners rommel en tuinafval in die veld stort. Tydens die besoek Dinsdag was ‘n man juis besig om vullis van sy bakkie af te laai en in die veld te stort.