PA-verkeersman onskuldig
“Geregtigheid het vandag weer geseëvier.”
So het Andrew Meintjies (53), voormalige verkeersman van Prins Albert wat van bedrog aangekla was, verlede Donderdag na sy vryspraak in die Oudtshoorn streekhof gesê.
Meintjies is daarvan aangekla dat hy toetse vir leerlingrybewyse gemanipuleer en rybewyse in ruil vir betaling uitgereik het.
Daar was trane van blydskap en vreugde onder familie en vriende van Meintjies nadat streeklanddros LA Wilkens bevind het dat daar te veel teenstrydighede en weersprekings in die staatsgetuies se weergawes was.
Die hof het ook bevind dat videomateriaal wat aan die hof voorgehou is nêrens aantoon waar geld aan die beskuldigde oorhandig word nie.
“Die staat het nie sy saak bo redelike twyfel bewys nie en daarom is die beskuldigde geregtig op vryspraak,” het die landdros bevind.
Meintjies se regsverteenwoordiger, Mathilda van Niekerk, het in haar betoog gesê die getuienisse van die ondersoekbeampte, ao. Jason Pietersen, ‘n polisie lokvink, ao. Cokwiswa Rahlushe, en ‘n middelman, Grant Paulse, wat na bewering die geld aan Meintjies oorhandig het, het hemelsbreed van mekaar verskil. Sy het dit aan Rahlushe gestel dat sy haar getuienis aanpas.
Paulse, die laaste staatsgetuie, het verlede week onder kruisverhoor getuig die verklarings wat hy aan die polisie afgelê en in die hof aan hom voorgehou is, is nie korrek nie.
“Wat ek nou in die hof sê dit is die waarheid,” het hy getuig.
Hoewel hy vir langer as twee jaar werkloos was, is hy nie vir vriend of vyand kwaad nie, sê Meintjies, en sy familie en vriende vir hul ondersteuning bedank. “Ek het sterker anderkant uitgekom.” Meintjies is in Maart 2016 op Drie Susters deur die Valke in hegtenis geneem.