32 jaar vir verkragting en poging tot moord

‘n Man wat op twee aanklagte van verkragting, twee van poging tot moord en versuim om aan borgtogvoorwaardes te voldoen, skuldig bevind is, is Vrydag in die Oudtshoorn-streekhof 32 jaar tronkstraf opgelê.

Alex Pietersen van die informele woonbuurt, Black Joint, Bongolethu, is daaraan skuldig bevind dat hy op 8 Maart 2017 ‘n 28-jarige vrou in Kanaalweg, gedwing het om seksuele dade met hom te pleeg en haar daarna verkrag het.

Nadat hy op borgtog vrygelaat is, het hy op 28 Maart 2017 die vrou met ‘n mes gesteek, gewurg en later ook met ‘n skroewedraaier gedreig om haar dood te maak.

Die staatsaanklaer, Elaine Plaatjies, het die hof vir lewenslange gevangenisstraf gevra omdat geen wesenlike en dwingende omstandighede bestaan om daarvan af te wyk nie.

Streeklanddros Daniel Boks het met vonnisoplegging gesê Pietersen toon geen berou nie en dat die hof nie ligtelik van voorgeskrewe vonnisse moet afwyk nie. Gemeenskapsbelang kom ook sterk na vore en hy is skuldig bevind aan ernstige misdrywe.

Die twee aanklagte van verkragting is vir vonnisdoeleindes saamgevoeg en Pietersen is daarvoor 20 jaar gevangenisstraf opgelê.

Hy is tot agt en vier jaar onderskeidelik vir die aanklagte van poging tot moord gevonnis en ‘n verdere ses maande vir versuim o maan borgtog voorwaarde ste voldoen. Hy is ook onbevoeg verklaar om ‘n vuurwapen te besit.