Bekommernis oor begraafplaas
Terwyl die algemene toestand van die Oudtshoorn-begraafplaas baie skoner is as wat ‘n aantal maande gelede die geval was, is grafte wat beskadig word en besoekers wat onveilig voel steeds ‘n probleem. Die begraafplaas was onlangs weer in die kollig toe die munisipaliteit hulle kommer uitgespreek het oor soveel as tien grafte wat kort na mekaar beskadig is. Die
Oudtshoorn Courant het in Junie berig dat die munisipaliteit in ‘n verklaring gesê het dat hulle bewus is van die beskadigde grafte en dat hulle die families van die oorledenes probeer opspoor om die misdrywe aan te meld. Daar is ook gevra dat die publiek die grafte van naasbestaandes besoek om te kyk of daar skade aangerig is.
Die koerant het dié week, na oproepe van besorgde inwoners, self die begraafplaas besoek en op talle beskadigde grafte afgekom. Daar was ook duidelike tekens dat leeglêers tussen die grafte en bosse slaap, vuurmaak en kuier.
Selfs personeel wat die begraafplaas moet onderhou word nie ontsien nie. Een van die vyf skoonmakers wat elke dag rommel opruim, was verlede week die slagoffer van ongewenste elemente by die begraafplaas toe daar by haar motor ingebreek is terwyl sy ‘n ent verder besig was om op te ruim.
Haar motor se ruit is stukkend geslaan en ‘n rugsak is uit die voertuig gesteel. Die
Oudtshoorn Courant het dié week weer ‘n navraag aan die munisipaliteit gestuur.
Volgens Ntobeko Mangqwengqwe, senior woordvoerder van die Oudtshoorn munisipaliteit, word die situasie steeds dopgehou. Daar word in die reaksie nie melding gemaak van enige daadwerklike stappe wat tans deur die munisipaliteit geneem word om die begrafplaas te beveilig nie. Ten spyte daarvan dat mense wat by die begraafplaas werk en inwoners wat grafte besoek sê dat daar leeglêers op die terrein slaap, is die munisipaliteit volgens Mangqwengqwe nie bewus van leeglêers in die begraafplaas nie. Hy het egter die publiek aangemoedig om enige insidente by die munisipale wetstoepassers (044 203 3121) aan te meld.
Inwoners is ook gevra om enige verdagte optrede by die begraafplaas of ander voorvalle van vandalisme telefonies by 044 203 3900 of per e-pos by valencia@ oudtmun.gov.za aan te meld. Daar was nie gemeld of die munisipaliteit wel naasbestaandes van oorledenes waarvan grafte beskadig is, kon opspoor nie.