Klein Karoo Klassique om die draai
Die tiende verjaarsdag van die Klein Karoo Klassique in Oudtshoorn word vanjaar gevier met tien uitstaande hoofuitvoerings, wat die premières van drie nuwe Suid-Afrikaanse komposisies insluit. Die Klassique word jaarliks deur Kunste Onbeperk aangebied en vind vanjaar vanaf 9 tot 12 Augustus plaas. Liefhebbers van klassieke musiek kan R400 spaar deur gebruik te maak van die pakketaanbod van slegs R900 vir al tien uitvoerings.
Besprekings vir die Klassique Pakket kan by Computicket gedoen word.
Klassique-feesgangers gaan die eerste wees om ’n voorsmaak te kry van MISA, ’n nuwe mis met ’n Suid-Afrikaanse invloed, en as’t ware deel te word van ’n stukkie musikale geskiedenis. Die musiek word gekomponeer deur Antoni Shonken, Antjie Krog skryf die teks en Marthinus Basson behartig die regie.
Ter voorbereiding van uitvoerings landwyd in 2019 word ’n spesiale demonstrasielesing van 60 minute van die MISA aangebied. Die lesing begin met voorlesings en uittreksels deur verskeie rolspelers, onder andere deur Krog en soliste van die Kaapse Operakoor. Daarna volg ‘n gesprek en ’n geleentheid vir die gehoor om vrae te vra en deel te neem.
The New Old – Die nuutheid van oudheid, spog met twee nuwe Suid-Afrikaanse komposisies, onderskeidelik van Clare Loveday en Arthur Feder, spesiaal
gekomponeer vir die trio-kombinasie van klavier (Mareli Stolp), viool (Waldo Alexander) en klarinet (Morné van Heerden). Ook ingesluit in die program
is onder meer Strawinski se L’Histoire du
Soldat.
Die befaamde Odeion-strykkwartet span kragte saam met die pianis Albie van Schalkwyk en gehore kan uitsien na musiek uit die laat Romantiese tydperk van onder andere Leoš Janáč ek en César Franck.
Van die gewildste musiek uit musiekspele, operettes en operas vorm die kern van André Schwartz (tenoor) en Lynelle Kenned (sopraan), begelei deur Melissa van der Spuy, se Soirée Musicale, terwyl die Charl du Plessis Trio, met Du Plessis (klavier), Werner Spies (kontrabas) en Peter Auret (tromme), met Night at the Opera operamusiek ’n eiesoortige jazz-kinkel gee.
Die Boulevard Harmoniste, ’n sesstem-acappella-groep, het deur die jare bekendheid verwerf vir hul uiteenlopende repertoire – van klassiek tot ligter en volksmusiek. Hul program by Klein Karoo Klassique sluit werke van Claude Debussy, Pierre Passereau, Pierre Certon, Hans Leo Hassler, Juan del Ecina en verwerkings van tradisionele Skotse en Amerikaanse spirituele werke in.
Uit België kom die internasionale trekklavierspeler Tuur Florizoone, wat musiek van ’n verskeidenheid genres optower. Sulayman Human, bekende boorling van Oudtshoorn en bekroonde pianis, en die jong fluitspeler Myles Roberts vertel hul eie stories terwyl hulle die gehoor op ’n musikale wêreldreis neem.
Janelle Visagie (sopraan) en José Dias (pianis), wenners van 2018 se kykNET Fiësta vir die beste prestasie in klassieke musiek, bring ’n Franse geur na Oudtshoorn met La Bonne Chanson: Die Franse kunsliederskat. Buiten vir die gelyknamige liedsiklus van die titel van Gabriel Fauré, sluit dit ook komposisies van die Franse komponiste Maurice Ravel, Claude Debussy, Francis Poulenc en Henri Duparc in.
Die week word oudergewoonte afgesluit met die ATKV-afsluitingskonsert. Cecilia Rangwanasha en Hlengiwe Mkhwanazi, albei ATKV Muziqanto-wenners, begelei deur Sulayman Human, tree op in ’n program met bekende operaduette. Human sal ook ’n solo-uitvoering lewer.
Ter stoflike aanvulling by die sielskos is daar heerlike Liplekker-ervarings en wynproeë asook verskeie ander konserte, kunsuitstallings en ervarings.
Volledige inligting is beskikbaar by klassique.co.za. Kaartjies kan bespreek word by Computicket. Óf skakel Kunste Onbeperk se kantore by 044 203 8600.