Verkragter tien jaar tronk toe
‘n Man (43) van Oudtshoorn, wat sy vrou uitgesluit en toe haar niggie in die huis verkrag het, is verlede week in die Oudtshoorn streekhof tien jaar tronkstraf opgelê.
Streeklanddros Daniël Boks het Jack Malgas se weergawe dat die deur van sy huis oop was en die klaagster tot seks ingestem het, as vals en leuenagtig verwerp.
Die 32-jarige vrou het ná die voorval die deur oopgekry en in die donkerte na haar kêrel in Toekomsrus gehardloop om hom van die verkragting te vertel. Sy was so getraumatiseerd dat sy daar bewusteloos ineengesort het en dit is volgens die landdros nie die optrede van ‘n vrou wat toestemming tot geslagsgemeenskap gegee het nie. Malgas het die deure toegehou ten spyte van sy vrou se geklop aan die venster en geroep dat hy dit oopmaak. Volgens hom het die klaagster haarself uitgetrek en gesê, “kom ons maak klaar” hoewel hulle nie vooraf daaroor gepraat het nie. Die vrou het egter getuig dat Malgas haar op ‘n dubbelbed gedwing, ontklee en verkrag het nadat hulle vroeër die aand by ‘n nagklub was.
Die staatsaanklaer, Elaine Plaatjies, het vir die minimum vonnis van 10 jaar, gevra omdat Malgas twee vorige veroordelings van gesinsgeweld op sy rekord het en dit nie verbasend is hoedat hy opgetree het nie. Hy was ‘n vaderfiguur vir die klaer en het sy vertrouensposisie misbruik. Volgens die landdros is dit so jammer dat die beskuldigde
altyd ondersteun word en daar altyd “verby die slagoffer” gekyk word asof sy die groot sondebok is. Hy het bevind dat geen wesenlike en dwingende redes voor die hof gebring is om af te wyk van die voorgeskrewe minimum vonnis van tien jaar nie. Hy het Malgas ook onbevoeg verklaar om ‘n vuurwapen te besit.
Vonnis verrigting eis vir‘ n wyle onderbreek toe Malgas se vrou onbedaarlik begin huil het en uit die hof geneem moes word. Malgas het die hof met duime in die lug vir familie en vriende verlaat.