AfriForum betwis riooltariewe
Die Oudtshoorn-munisipaliteit se riooltariewe word deur AfriForum betwis.
Deon de Jager, AfriForum se Wes-Kaapse distrik s koördineerder e nA r no Greyling, AfriForum Oudtshoorn se waarnemende voorsitter, het Woensdag 13 Junie ‘n aanmaning op die Oudtshoorn munisipale bestuurder, Allen Paulse, beteken. Volgens die aanmaning word uiteengesit dat die munisipaliteit se nuut-ingestelde riooltariewe wat volgens aantal spoeltoilette bereken word, foutief is. In ‘n persverklaring skryf De Jager en Greyling: “Die berekening is in stryd met artikel 74(2)(b) van die Munisipale Stelselswet, 2000 (wet no. 32 van 2000) wat bepaal dat die bedrag wat individuele verbruikers van munisipale dienste moet betaal aan die hand van die gebruik van diesulke dienste bepaal moet word.”
Volgens AfriForum hou die aantal toilette wat ‘n huishouding het, geen verband met die hoeveelheid riool wat op die perseel gegenereer word nie. Hulle uitgangspunt is dat die werking van spoeltoilette afhanklik is van water wat die munisipaliteit verskaf en dus bepaal kan word. Met meterlesings kan die volume riool wat gegenereer word aan die hand van die waterverbruik bepaal word.
“In praktyk word die rioolgenerering gewoonlik volgens klimatologiese omgewingsfaktore op tussen 60% en 70% van die drink waterverbruik bepaal ,” sê AfriForum.
In die persverklaring sê hulle Paulse is gemaan om binne 14 dae ná datum van die skrywe aan te dui watter stappe in plek gestel gaan word om te verseker dat die munisipale raad die riool tarief berekening regstel, asook die rekeninge wat foutiewelik op die aantal toilette gebaseer is.
“Indien die munisipaliteit in gebreke bly om aan AfriForum se versoek gehoor te gee, sal die organisasie remediërende stappe, wat moontlike regsaksie insluit, oorweeg.”
Paulse het Woensdag 20 Junie gesê: “Die munisipaliteit erken ontvangs van AfriForum se klagte. Die aanmaning geniet aandag en ons sal binne 14 dae daarop reageer.”
Greyling het aan die Oudtshoorn Courant gesê: “Ons is tevrede met die munisipaliteit se reaksie en gee hulle ‘n billike kans om op die aanmaning te reageer.”