Rofstoei sorg vir opwinding
Opwinding het geheers by die geldinsamelingsdag vir Big Bad Bruce, ‘n Oudtshoorniet en voormalige stoeier, wat beide sy bene gedeeltelik weens diabetes verloor het.
Bruce het 18 jaar amateur en 21 jaar professioneel gestoei voor hy in 2010 weens diabetes sy stoeiloopbaan moes staak.
Die stoeikampioenskap het Saterdag 16 Junie by Smitswinkel in Oudtshoorn plaasgevind.
Ongeveer 200 mense het dit bygewoon, om te sien hoe Bruce se voormalige stoeivriende én vyande mekaar die stryd aansê. Die stoeiers was Terri Middoux the Frenchmen, Blacksmith, Ratel, Dirty Angel, Dirty Angel 2, Devon Shooter, Phantom, PE Warrior, TNT Explosion, Woodcarver, Ananzi.
Bruce is self op ‘n stadium in sy rolstoel in die kryt gesit saam met een van sy vyande, Dirty Angel. Volgens Bruce het Dirty Angel sedert 2009 ‘n wrok teen hom omdat hy hom met ‘n stoel in die hospitaal in geslaan het.
“Dirty Angel het my van agter gegryp en in my rolstoel by die kryt probeer uitstoot, maar my stoeivriende het my gehelp.”
Volgens Bruce se suster, Gerda Tait, het Dirty Angel te kenne gegee dat hy dit nie daar gaan laat nie en teen Oktober gaan terugkeer om teen Bruce en sy vriende wraak te neem.
Bruce verwelkom die beoogde dag se gevegte.
Die stoei was ’n geldinsameling vir Big Bad Bruce om ‘n elektriese rolstoel te bekom.
Bruce beplan om ‘n amateur-stoeiklub in Oudtshoorn te begin. Belangstellendes kan Tait by 074 474 7743 skakel.