Beweerde kinderverkrag-ter in hof
Die gemeenskap van Ladismith het Maandag aan ‘n vreedsame plakkaatoptog voor die Ladismith-landdroshof deelgeneem.
Die man wat na bewering ‘n 9-jarige meisie op 11 Junie in Ladismith verkrag het, het vir ‘n borgtogaansoek verskyn. Die landdros het egter die aansoek na 25 Julie uitgestel.
Die Oudtshoorn Courant het vroeër die maand berig dat die 64-jarige man twee dae soek was voor die polisie hom in Oudtshoorn in hegtenis geneem het.
Die man het na bewering die meisie R10 betaal om hom die pad na Zoar te wys waar hy haar langs die pad tussen bosse verkrag het. Die meisie is in George-hospitaal geopereer en sterk by die huis aan. Volgens betroubare inligting wat die
Oudtshoorn Courant ontvang het, was daar ‘n lasbrief uit vir sy arrestasie omdat hy in twee ander dorpe in die Wes-Kaap, Kleinvlei en Tulbagh, vir verkragting gesoek word. Hy het glo nie vir sy hofsake opgedaag nie en word as ‘n vlugrisiko hanteer. Beide die klaers in die sake waarvoor die verdagte in die hof moes verskyn, is glo 16 jaar oud.
Die man se naam is aan die Oudtshoorn Courant bekend, maar kan nie bekend gemaak word voordat hy in die hof gepleit het nie. (In seksuele sake moet beskuldigdes eers pleit voordat hul identiteit bekend gemaak word.)
Hy het verskeie byname, onder andere, Duiwel en Devil Eyes.
Bradley Benadus, ‘n gemeenskapsleier van Ladismith, het vandag ‘n memorandum aan die staatsaanklaer in die saak oorhandig.
Volgens hom is die gemeenskap geweldig ontsteld oor die verkragting van die jong meisie.
In die memorandum eis die gemeenskap dat borgtog aan die beweerde verkragter geweier word en ook dat hy nie langer in die Ladismith-gevangenis aangehou word nie.
“As gemeenskap voel ons vreesbevange in ons eie dorp,” lui ‘n deel van die memorandum.