19-jarige rand glo weer aan
Die vrylating van ‘n jong man van Oudtshoorn wat weer ‘n misdaad gepleeg het terwyl hy op waarskuwing vrygelaat is, is Vrydag in die Oudtshoorn-streekhof ingetrek en sal nou in aanhouding bly tot die sake teen hom afgehandel is.
Francois van der Bergh (19) het in September 2017 by ‘n huis in Victoriastraat ingebreek en die huiseienaar na bewering vyf keer met ‘n skerp voorwerp in die bors gesteek waarna hy gevlug het.
Hy is nog dieselfde aand met twee bebloede messe in sy besit in hegtenis geneem en aangekla van huisbraak en poging tot moord.
Hy is daarna in die landdroshof onder pleegsorg geplaas en op verskeie voorwaardes vrygelaat. Van die voorwaardes was dat hy nie weer by misdaad betrokke raak nie en alle hofverskynings bywoon.
Hy is egter op 4 Junie vanjaar op aanklag van roof met verswarende omstandighede in hegtenis geneem nadat hy glo ‘n man in Voortrekkerweg met ‘n skêr gesteek en van sy selfoon beroof het.
Die staatsaanklaer, Corné Pretorius, het ‘n aansoek gebring dat Van der Bergh se waarskuwing en vrylating ingetrek moet word en hy in aanhouding bly tot die sake teen hom afgehandel is.
Streeklanddros Retha Pretorius het Vrydag bevind dat Van der Bergh ‘n tendens toon om by misdaad betrokke te raak en ‘n gevaar inhou vir die samelewing. Sy vrylating is ingetrek en die saak is tot 30 Julie uitgestel.
Van der Bergh se regsverteenwoordiger, Gideon Badenhorst, het bygevoeg dat dit sinvol sal wees om die sake teen die verdagte saam te voeg.