Paartjie in Knysna vasgetrek
Die nuus oor die werknemer van Badenhorst Slaghuis, Fritz Jacobs, wat Woensdag met R242 000 van die werk se geld en in die werk se voertuig saam met sy vriendin verdwyn het, het Woensdag groot opslae op sosiale media veroorsaak. Sy vriendin is Tammy Weyers (27) wat ook ‘n Facebook-profiel as Tammy Michelle Martin het.
Die paartjie se rit met die werksbakkie was egter van korte duur en hulle is Donderdagoggend vroeg in Knysna in hegtenis geneem. Die bakkie en die geld is ook gevind. Dit is egter nog nie duidelik of die hele bedrag teruggevind is nie. Frederick Jacobus Francois Jacobs was die afgelope vier maande as gesondheids- en veiligheidsbestuurder in diens van Badenhorst Slaghuis. Volgens die mede-eienaar van die slaghuis, Bennie Byleveld, was Jacobs onder andere verantwoordelik daarvoor om geld te gaan bank en hy het dit gereeld gedoen.
“Hy sou oudergewoonte Woensdagoggend die geld gaan bank het. Onder normale omstandighede bel hy en sê my as hy by die een bank klaar is en op pad is na die volgende een. Hy het my gister nie gebel nie en ek het toe die banke gebel. Toe ek agterkom dat hy nog nie by die banke was nie het ek dadelik onraad vermoed.”
Byleveld sê hy en die polisie was Woensdag saam by die vriendin se werk gewees, maar het uitgevind dat sy nie vir haar skof opgedaag het nie.
Jacobs en Weyers het saam gewoon en, volgens Byleveld, was die motorfiets waarmee hulle gereeld gery het nog by die woonstel wat hulle gedeel het. Beide hulle selfone was sedert Woensdag afgeskakel.
Jacobs, wat oorspronklik van Van der Bijlpark kom, se broer was volgens Byleveld uiters besorg oor die verdwyning en het gereeld geskakel om te hoor of daar nuus is. Boodskappe wat op Badenhorst Slaghuis se Facebook-blad geplaas was, was binne ure wyd gedeel en het ‘n groot aantal kommentare ontlok. Dit is ironies dat Jacobs verantwoordelik was vir die bestuur van dieselfde Facebook-blad voordat hy verdwyn het.
Volgens Byleveld het die polisie hom gisteroggend in kennis gestel dat Jacobs en Weyers in Knysna aangekeer is. Teen spertyd kon hy nog nie bevestig of al die geld nog in die paartjie se besit was nie.
Sersant Gretchen Micheals, woordvoerder van die Oudtshoornpolisie, sê Jacobs en Weyers is op ‘n klag van diefstal en op ‘n klag vir die gebruik van ‘n voertuig sonder die eienaar se toestemming in hegtenis geneem. Die twee verdagtes sal in alle waarskynlikheid vandag in die Oudtshoorn-landdroshof verskyn.