Nuwe hoop vir Oudtshoorn
Verskeie rolspelers in die ekonomie en bestuur van Oudtshoorn het Dinsdagaand en Woensdagoggend die versekering ontvang dat die ekonomiese herstel van die dorp vinniger plaasvind as wat voorspel is.
Volgens Attie van Zyl en Charl Bouwer van Inca Potfolio Management in Johannesburg gebruik hulle Oudtshoorn tans as ‘n voorbeeld van wat vermag kan word as administrasie toegelaat word om sonder politieke inmenging en met goeie bestuur te funksioneer.
Van Zyl, HUB van Inca, het Dinsdagaand by ‘n dinee by De Opstal, Inca se bevindings van hulle werk met die munisipaliteit die afgelope twee jaar met genooide gaste gedeel.
Twee Wes-Kaapse ministers, Anton Bredell (plaaslike regering) en Anroux Marais (kultuursake en sport) was onder die gaste. Inca is aan die einde van 2015 deur Bredell aangestel om ‘n finansiële omkeerstrategie vir Oudtshoorn te implementeer nadat hy die dorp onder administrasie geplaas het. Tydens sy aanbieding het Van Zyl die munisipale bestuurder, Allen Paulse en Felix Lötter, direkteur van finansies gelukgewens met die wyse waarop hulle die krisis bestuur het. Volgens Van Zyl het hulle aanvanklik bereken dat dit Oudtshoorn drie tot vier jaar gaan neem om die reuseskuldlas wat die raad in 2015 gehad het, af te betaal en ‘n positiewe bankbalans te hê.
“Die munisipaliteit het egter, met streng bestuur, daarin geslaag om binne slegs twee jaar R110 miljoen se skuld aan diensverskaffers sowel as R54 miljoen skuld aan Eskom terug te betaal. Hulle het nie net die skuld terugbetaal nie, maar ook daarin geslaag om kontant van ongeveer R70 miljoen in die bank te kry. Dit nadat hulle ‘n bankskuld van omtrent R48 miljoen ook nog geërf het,” het hy gesê.
Paulse het op sy beurt gesê dat Oudtshoorn nog groot uitdagings in die gesig staar, maar dat die situasie besig is om drasties te verbeter. Hy het gesê dat die topbestuur van die munisipaliteit sowel as die verskillende politieke partye tans saamwerk met een doel voor oë; om die dorp weer op ‘n gesonde finansiële voet te kry wat inwoners sal bevoordeel. Die dinee van Dinsdagaand is uit borgskappe van verskeie besighede in Oudtshoorn en George gefinansier.
Van Zyl en Bouwer het ook Woensdagoggend verskeie sakemense by Turnberry Boutique Hotel toegespreek. Na afloop van die aanbieding het een van die sakemanne met uitgebreide belange op die dorp te kenne gegee dat hulle, nadat die nuutste inligting voorgehou is, weer vertroue het om in die dorp te belê en ook mense van buite sal aanmoedig om te belê.
Van Zyl het gesê dit is nou uiters belangrik dat die breër gemeenskap van Oudtshoorn en die sakegemeenskap ‘n positiewe boodskap van die dorp uitdra wat kan bydra tot ekonomiese groei.
In reaksie op ‘n vraag oor watter stappe geneem word teen diegene wat verantwoordelik was vir die verlies van miljoene rande, het Paulse gesê die Valke het hulle ondersoeke afgehandel en die dossiere is tans by die Direkteur van Openbare Vervolging wat die kriminele proses verder sal hanteer.