Boeremusiekfees groei jaarliks
Die Grootvoël-boeremusiekfees wat die afgelope naweek by Brian’s Grill aangebied is het byna 1 000 mense gelok. Agt boeremusiekorkeste van so vêr as Namibië, Gauteng en die Kaap het die dansvloer lewendig gehou.
Sewe gemeenskapsradiostasies in verskillende dele van die land, het blootstelling aan die fees gegee. Die volgende twee Saterdae se boeremusiekprogram wat tussen 14:00 en 15:00 op RSG uitgesaai word, gaan musiek wat by die Grootvoëlfees gespeel is, uitsaai.
Volgens Sarie Emmerich, een van die organiseerders was die kuiersaal by Brian’s Grill Vrydagaand so vol dat ekstra sitplek vir Saterdag voorsien is.
Die eerste Grootvoël-boeremusiekfees is ‘n paar jaar gelede deur die sakeman Willem Marais gereël. Nadat hy ‘n werksaanbod in die buiteland aanvaar het, was daar vrese dat die fees sou doodloop. Die vrese is egter die afgelope naweek deeglik besweer en volgens die organiseerders begin hulle eersdaags reeds met reëlings vir aanstaande jaar se fees.
Marais was hierdie naweek in Oudtshoorn en soos met die vorige feeste was hy gereeld, soos wat dit ‘n liefhebber van boeremusiek betaam, voor by die verhoog.
Een van die besoekers, Deon Smit, het in Bloemfontein van die fees gehoor en gewapen met sy kamera per motorfiets gereis om die fees by te woon.
Hy is Sondagoggend weer op sy ysterperd terug Bloemfontein toe.