Alles gereed vir landbou-expo
Reëlings is in plek vir die tweede Kango Agri Expo, wat vanjaar in samewerking met Klein Karoo Saadproduksie (KKSP) aangebied word.
Die Expo word op 18 Oktober by Kamnatieloop, KKSP se Kamnatieproefplaas langs die Rooiheuwel/ Kammanassiepad aangebied. KKSP se erkenningsaand vir saadprodusente word op 17 Oktober gehou, en saadprodusente wat dit bywoon word genooi om ook die Expo by te woon.
Ongevee 50 stalletjies van landboudiensverskaffers neem vanjaar deel aan die Expo, wat verlede jaar vir die eerste keer deur Kangovalleieboerevereniging op Schoemanshoek aangebied is.
“Die doel van die Expo is om landboudiensverskaffers en boere in die KleinKaroo en Tuinroete bymekaar te bring in ‘n gesellige, informele plaasatmosfeer,” sê Chris Botha, wat die Expo saam met sy vrou, Susan van Trapsuutjies-projekte en Kobus Theron van Klein-Karoo Agri reël. “Ons wil graag plaaslike boere daar hê, maar rig ook ‘n uitnodiging aan ander boereverenigings, soos die van BeaufortWes en Prins Albert.”
Naas die uitstallings wat produkte sal bekendstel, sal van die uitstallers ook demonstrasies lewer wat verband hou met onder meer grondbewerking, saadbedvoorbereiding, bespuiting en besproeiing. Die hekke open Donderdag 18 Oktober om 10:00 en sluit om 17:00 en toegang is gratis. Volg aanwysings vanaf die treinbrug by die silo’s na Kamnatieloop op die Rooiheuwel/Kammanassiepad. Kontak Susan Botha by 083 500 5900 of sbotha0@gmail.com of Kobus Theron by 079 619 0124 of ktheron@ klein-karoo. com vir meer inligting.