Afrigtingskonferensie dui rigting aan
Die Eden-sportraad (EDENSR) se eerste afrigterskonferensie is as deel van die Mosselbaai-sportfees op 19 September in Mosselbaai aangebied. Meer as 70 afrigters van 27 sportfederasies het die geleentheid gehad om insette te lewer en die rigting te bepaal waarheen sportafrigting in Eden op pad is. Verskeie topafrigters het aanbiedings gedoen oor aktuele sake in afrigting.
Desmond Speelman, voorsitter van EDENSR, het in sy openingsrede na heelwat van die uitdagings in afrigting verwys. Hy het dit ook duidelik gestel dat die naam Edensportraad van krag sal bly nadat die naam van die streek onlangs verander het. Groot koste, tyd en energie is destyds aangegaan om van die ou SWD na die Eden-naam oor te skakel en volgens hom is daardie proses nog nie eens heeltemal afgehandel nie.
Trevor Davis, nasionale afrigter van Rolbal SA, het die Nasionale Afrigringsraamwerk aan die konferensie voorgehou. Dit het duidelik na vore gekom dat die raamwerk nog ver van implementering is en dat daar veral weer na die vrywilligerafrigter in die raamwerk gekyk moet word. Ook die geweldige hoë kostes om te registreer en te akkrediteer, gaan veral hierdie korps negatief beïnvloed.
Gary Hampson, afrigter van die SWDkrieketspan, het ‘n puik aanbieding, Uitnemendheid in DSF – wat is nodig, gelewer wat opgevolg is deur "Edensportakademie – wat dit bied” deur André Alexander. Ander sprekers was Elma Davis, Protea-rolbalspeler en Claudio Miller. Protea-lewensredderingsafrigter, Abrie de Swardt ([EDENSR Afrigterskommissievoorsitter) en adv. Lwandiso Kwababana (WK Afrigterskommissie-voorsitter) wat aangenaam verras was met wat die afrigtingstruktuur in Eden alreeds tot stand gebring het, en hy het ook genoem dat die Wes-Kaapstruktuur heelwat uit hierdie konferensie kan neem en daarop voort te bou.
Morné Pietersen, EDENfm-bestuurder, het as programdirekteur opgetree.
Van die belangrikste punte wat uit die afrigterskonferensie voortgespruit het, is:
Die rol van die vrywillerafrigter word geweldig onderskat;
Die opgradering van ‘n databasis vir afrigters waar Eden se verouderde databasis van meer as 1 400 afrigters dringend aangepas moet word. Dit geld ook vir elke sportfederasie in Eden;
Die nasionale langtermyn ontwikkelingsproses vir afrigters het ernstige gebreke en is meer as twee jaar agter skedule;
Damesafrigters se ontwikkeling moet ernstige aandag geniet en prioriteit wees;
Enige afrigter wat met kinders o.16 werk moet ‘n polisieklaring besit om te mag afrig;
Oplossings en fondse moet gevind word om afrigting en afrigters volhoubaar te ontwikkel en te akkrediteer;
So ‘n konferensie behoort ‘n jaarlikse instelling te word.
Die volgende groot projek van die EDENSR Afrigterskommissie is die jaarlikse “Coaches High Performance Workshop” wat op Saterdag 20 Oktober by die Edensportakademie op Oudtshoorn aangebied word.
Vir navrae skakel Abrie de Swardt by 072 348 1961.