Wegholtrok op Robinsonpas
Marco Louw en sy eggenoot het wonderbaarlik oorleef toe hul vragmotor Saterdag omstreeks 11:00 op die Robinsonpas onklaar geraak en digby die ingang na Ruiterbos omgeslaan het.
Volgens ‘n ooggetuie, Stephan Terblanche, was dit net genade dat die insittendes die ongeluk oorleef het.
Die vragmotor en twee waens, wat staalstrukture van etlike tonnemaat vervoer het, het Saterdagoggend, 29 September teen die bloekombome by die ingang na Ruiterbos op die R328 te lande gekom. Louw, die eienaarbestuurder van die vragmotor het sover bekend ‘n been in die voorval gebreek, en sy eggenoot het ‘n enkel en skouerbesering opgedoen. Beide is na die Mosselbaai-hospitaal vir behandeling geneem.
Terblanche het met die grootste lof van ‘n lid van die KwaNonqaba-polisie wat die toneel hanteer het, gepraat.
“Die polisielid het werklik die ekstra myl geloop. Hy het verseker dat die Louw-egpaar se persoonlike besittings beveilig word en het dit aan hulle terugbesorg. Hy het selfs tussenbeide getree toe ‘n omstander ‘n deel van die vragmotor wederregtelik wou verwyder en ook dit aan die egpaar besorg.”
‘n Inwoner van Oudtshoorn het oor die pas agter die trok gery en telefonies aan die Oudtshoorn Courant vertel dat rook skielik by die trok uitgeborrel het en kort daarna het onderdele van die vragmotor in die pad beland.
Volgens haar het die vragmotorbestuurder probeer stilhou, maar die trok het begin versnel. “Ek het self al swaarvragmotors bestuur en dadelik besef die vragmotor het nie meer remme nie.”
Sy sê die vragmotorbestuurder het op ‘n stadium aan die regterkant van die pad gery en dit het gelyk of hy die vragmotor teen die wal wil laat vasry om dit te stop. “Ek kon sien hy het werklik alles probeer om die vragmotor tot stilstand te bring en het toe by die draai net reguit gery om van die pad af te kom.”
Die ongelukstoneel is eers sowat 20:00 op Saterdagaand opgeruim.