Oorwinning vir Arende
Die SWD Arende het Vrydagaand hul vierde volpunte oorwinning agtereenvolgens behaal toe hulle die Boland Kavaliers op Outeniquapark met 54-28 geklop het.
Na vyf rondes in die Curriebeker-reeks se Eerste Liga-kompetisie is die Arende nou eerste op die punteleer met 21 punte en ‘n punteverskil van (+66).
Die Luiperds, wat die voorloper op die punteleer was, is die afgelope naweek deur die Griffons met 40-29 verras.
Die Arende pak Saterdagmiddag om 15:00 die OP Olifante wat Vrydagmiddag in Kempton Park deur die Valke met 101-29 vermorsel is, op die Despatch-sportterrein.
Vir die manne van die Suid-Kaap is dit belangrik om bo-aan die punteleer te eindig en die kompetisie vir die eerste keer in hul geskiedenis te wen. Die wenspan sal in ‘n promosie/religasie-wedstryd teen die Vrystaat-Cheetahs se Curriebekerspan speel, wat tans laaste op die punteleer is.
SWD het ‘n groot terugslag gekry toe hul Wynand Grassman, flank, in die tweede helfte die veld moes verlaat het weens ‘n kopbesering. Grassman is vervang deur Janneman Stander.
Die skeidsregter, A J Jacobs, het vir Luz Koza (loskopstut) en Nicolaas Immelman (flank) van die Arende asook Clinton Theron (vaskopstut) van die Kavaliers met geelkaarte van die veld gestuur.
Die Arende het in die eerste helfte skitterende hardlooprugby gespeel en vyf drieë gedruk en was na 36 minute se spel reeds met 36-14 voor gewees.
Swak besluitneming in die eerste helfte deur Boland om liewer die kantlyn op te soek as om pale toe te skop, het hul duur te staan gekom.
Boland het na rustyd met ‘n puik terugvegpoging begin. Die Arende het ook ‘n fout gemaak deur te veel balbesit terug te skop in die Kavaliers se hande. Boland het aangeval en twee skitterende drieë gedruk.
Janneman Stander, plaasvervanger-flank, is in die 68ste minuut oor vir sy span se sesde drie. Die wenspan se vlugvoetige heelagter, Leighton Eksteen, wat by tye die Kavaliers dronk gehardloop het, was ongetwyfeld die beste speler op die veld. Eksteen, wat aangewys is as speler van die wedstryd, is in die 29ste minuut oor vir ‘n drie. In die 79ste minuut het hy gewys watter gees in die Arende kamp heers toe hy oor die doellyn is en die bal vir sy medespeler, Kirsten Heyns, plaasvervanger-linkervleuel) laat loop het om af te rond.
Die Arende se skerpskutter, Divan Nel (losskakel), wat die voorste puntemaker in die kompetisie was met 52 punte, het weer 19 punte met die skoen aangeteken. Sy taktiese skoppe en balverspreiding was uit die boonste rakke.