Plase spring ergste brande vry
Die brand wat verlede Woensdag, 24 Oktober, in die Outeniquaberge bokant Herold ontstaan het, is in snikhete, droë toestande deur stormsterk wind versprei sodat dit uiteindelik na ‘n week nagenoeg 65 000 ha bergveld en plantasies vernietig het.
“Die gebied beslaan sowat 65 000 ha, maar die finale opname moet nog gedoen word,” het Anton Bredell, Wes-Kaapse minister van plaaslike regering en omgewingsake Woensdagoggend per WhatsApp aan die Oudtshoorn Courant laat weet. “Persoonlik dink ek nie landbou het groot skade gely nie, die brand was meer in die berg en bosbouarea.”
Woensdag het inwoners en brandbestrydingspanne steeds geveg teen ‘n wegholbrand langs die Keurboomsrivier tussen De Vlugt, Knysna en Plettenbergbaai.
Adri van Rooyen, eienaar van Plaasmeisie Padstal in die Prins Alfredpas het Woensdagmiddag gesê dit brand sowat
18 km vanaf die padstal in die rigting van Dieprivier langs die Keurboomsrivier.
Boere in die Langkloof het Maandagnag angsvolle ure beleef toe die brand noordwaarts oor die berg versprei het. “Die wind het die vonke deur die lug geskiet – ek het só gedink aan die mense van Knysna wat in Februarie verlede jaar die angs beleef het,” het Karen Thomlinson van Schoonberg gesê. “Deur die Here se genade het ons geen mense, diere of strukture verloor nie.”
Nico Bester het gesê: “Ons het ons werkershuise ontruim en sowat 10 gesinne word nou in die gastelokaal op die plaas gehuisves. Dis net vroue en kinders waar jy kyk.” Maandagmiddag is die plaashuis ook as voorsorgmaatreël ontruim.
Volgens Pieter Campher van Ganzekraal het hulle werkershuise ontruim en gewag dat die wind draai om ‘n brandpad te maak om die werkershuise te beskerm.
EP van Rooyen van Vergenoeg agter Noll, het Woensdag gesê hy kon die brand wat oor die berg gerol het, betyds keer voordat dit appel- en peerboorde bereik het.
Verskeie brande wat vermoedelik deur weerlig veroorsaak is, is ook onder beheer gebring. Ricardo Classen van Uniondale het gesê ‘n brand in die Swartberge by Toorwater is onder beheer. Twee weerligbrande in die Gamkaberg en Sandberg is deur CapeNature se brandspanne onder beheer gebring. Nog ‘n brand wat in Grootvadersbosch deur weerlig veroorsaak is, is ook onder beheer gebring, het John Moodie gesê.
Henry Meyer wat by Ruiterbos boer en boere aan die suidekant van die Outeniquaberge by Agri Wes-Kaap verteenwoordig, het gesê ‘n voorlopige opname is gedoen. “Skade aan heinings wat in die brand vernietig is, beloop na raming sowat R5 miljoen, en skade aan watertenks en pypleidings sowat R3 miljoen.”
Volgens Meyer is die gevolge van skade aan waterinfrastruktuur nie onmiddellik sigbaar nie. “Ons gaan die gevolge van die skade aan infrastruktuur eers werklik beleef wanneer die boere nie water vir hul vee of weidings het nie.”
Die brand is teen gisteroggend onder beheer gebring.