Wen-embleem bekend gestel
Die wenontwerp van die Ek is Oudtshoorn-embleem is verlede Donderdagaand tydens die besigheidskamer se netwerkaand by Aifa bekend gestel. Die wenner van die kompetisie, Joanika Leonard, is reeds verlede maand aangekondig, maar die ontwerp was nog ‘n geheim totdat dit finaal afgehandel is. Joanika se ontwerp is die bekende plekaanwyser (pin drop) wat op die internet gebruik word om plekke aan te dui. Die embleem gaan by die ingange na die dorp opgerig word en sakeondernemings gaan ook aangemoedig word om die embleem by hulle persele aan te bring.
Ek is Oudtshoorn is ‘n inisiatief wat reeds verlede jaar deur Jaco Vorster begin is om inwoners bewus te maak dat elkeen ‘n ambassadeur van die dorp is.
“Elkeen van ons het die mag om ons dorp se beeld positief of negatief oor te dra, en dit is ‘n groot verantwoordelikheid,” het Vorster gesê.
Die netwerkaand is deur Aifa geborg. Tydens sy spreekbeurt het die hoof- uitvoerende beampte van Aifa, Pikkie Siebrits, gesê hy is verheug oor die reaksie op die openbare deelnameproses wat gehou is om inwoners se insette oor Aifa se teenwoordigheid in die dorp te bepaal. Die openbare deelnameproses was een van die stappe wat Aifa moes neem om aansoek te doen dat die ordonnansies wat die vliegskool se vliegure beperk, verslap sal word.
“Die reaksie was oorweldigend en uiteindelik het die munisipaliteit ons meegedeel dat slegs 3% van mense wat aan die proses deelgeneem het, gekant is teen Aifa se teenwoordigheid in die dorp.” Aifa is een van ongeveer 22 vliegskole wêreldwyd wat Chinese studente as kommersiële vlieëniers oplei.