Vrae oor lugsteun tydens die brand
Die koördineerders van die brandbestrydingspoging in George is fel gekritiseer oor die aanwending van lugsteun om die brande wat sedert Woensdag 24 Oktober woed, te blus. “As daar vroeër opgetree is sou die lugsteun meer effektief aangewend kon word,” het Conrad Maree, eienaar van Savannah Helicopters aan die George Herald gesê.
Maree het reeds Donderdag 25 Oktober die munisipaliteit gekontak en aangebied dat een van sy helikopters gebruik word. Daar was nog genoeg daglig om te kon vlieg en te help vure blus. Volgens Maree het ‘n verteenwoordiger van die munisipaliteit onderneem om na hom terug te kom.
Vrydag het Maree met ‘n verteenwoordiger van die munisipaliteit se rampbestuur gepraat: “Ek het besef hier kom probleme en het aangebied dat van ons helikopters van Wonderboom (Gauteng) hierheen gebring word.” “Daar is toe aan my gesê daar is twee helikopters Van Working on Fire (WoF) wat ingespan word.”
Maree benadruk dat die weersomstandighede Saterdag gunstig was en dat met gemak gevlieg kon word. “Die lug was skoon. Ek is nooit uitgeroep nie.”
Sondag het hy weer met die munisipaliteit kontak gemaak. “Ek het gesê ek is beskikbaar om te help.”
In die loop van die oggend is hy toe inderdaad gevra om te help en omstreeks 10:30 het hy opgestyg. “Die sigbaarheid was nie goed nie en na ‘n rukkie het ek teruggekeer na die Georgelughawe.”
Vroeg Sondagmiddag is hy weer gevra om te help en hy was sowat ‘n uur en 8 minute in die lug. Maree kan nie verstaan waarom daar nie al vroeër, kort na die uitbreek van die brand, opgetree is nie.
“Ons kon beslis Saterdag vlieg. Al wat hulle moes doen, was om na die weervoorspelling te kyk.”
Nog hulp aangebied
Lynn Potgieter van Titan Helicopters in George het aangebied dat hulle helikopters en vlieëniers gratis aangewend word om die brande te bestry. “Brandbestryding is nie ons kernbesigheid nie, maar ons helikopters is toegerus om Bambi-houers te dra en ons vlieëniers is opgelei in brandbestrydingstegnieke. Ons sou net verwag dat ons brandstofkostes gedek word,” het sy aan George Herald gesê. Potgieter het hulle dienste Sondag en Maandag aan WoF sowel as aan Garden Routedistriksmunisipaliteit gebied, maar teen Woensdagmiddag het niemand hulle nog genader om te help nie.
Sy sê egter sy kritiseer nie die besluit om nie Titan se hulpverleningsaanbod te aanvaar nie.
Kishugu Aviation het die kontrak om lugsteun te verleen aan WoF, ‘n inisiatief deur die department van omgewingsake.
Die Garden Routedistriksmunisipaliteit het by navraag in ‘n verklaring gesê die gebruik van lugsteun word deur die insidentbevelvoerder aangewend na sy diskresie. Uit die verklaring blyk dit dat ‘n tekort aan geld ‘n moontlike oorweging kon wees hoekom helikopters en vliegtuie nie vroeër en meer gereeld ingestuur is om die brande te bestry nie.
“Die Garden Routerampbestuursentrum is Sondag tussen 9:00 en 10:00 geopen op versoek van die provinsiale rampbestuursentrum - nie die brandweer nie.
Die doel van rampbestuur is om ‘n koördineringsplatvorm vir alle lynfunksies daar te stel, nie om die brandweerdiens as enkele lynfunksie te bestuur nie. Rampbestuur het geen begroting vir lugsteun nie.”
• Die distriksmunisipaliteit het dit duidelik gemaak dat hulle voel dat te midde van hulle brandbestrydingspogings hulle nie genoeg tyd gegun word om op Maree se uitsprake te reageer nie.
Die navraag is Dinsdag 14:00 aan hulle gestuur. ‘n Kompromie is aangegaan dat sekere aspekte van die Maree-kwessie uitgelaat sal word om die munisipaliteit grasie te gee en die storie is inderdaad aangepas.
Al vraag wat George Herald beantwoord wou hê is hoekom geen lugsteun Saterdag aangewend is nie. Gister om 12:00 is via WhatsApp geantwoord dat ‘n ondersoek sal volg en dat weersomstandighede nie gunstig was vir vlieg nie. Daar is onderneem om na afloop van ‘n nabetragtingsessie terugvoer te verskaf. Ilse Schoonraad, Group Editorsredakteur