Senior weermagoffisiere weer vlugtig in hof
Die twee senior weermagoffisiere wat teregstaan op klagtes dat hulle meer as twee jaar gelede die Oudtshoorn-polisiestasie wou opblaas en die polisie in die uitvoering van hul pligte verhinder het, het Vrydag weer vlugtig in die Oudtshoornstreekhof verskyn.
Brig. genl. Xolani Mankayi en kol. Nkhabu Nthejane, albei voormalige bevelvoerders van die Infanterieskool, het na bewering in Mei 2016 soldate in gepantserde voertuie na die Oudtshoorn-polisiestasie laat opruk en glo gedreig om die stasie op te blaas indien ongeveer 35 soldate wat by ‘n kuierplek in Bongolethu in hegtenis geneem is, nie onmiddellik vrygelaat word nie.
Die verhoor van die twee was in ‘n gevorderde stadium toe die voorsittende beampte, streeklanddros Mark van Wyngaardt, in November verlede jaar gesterf het.
Dit is daarna as nuwe saak op die hofrol geplaas. Die staatsaanklaer het die hof Vrydag meegedeel dat nuwe vertoë wat die twee beskuldigdes gerig het, nog nie op haar tafel beland het nie en sy dus nie daarop kan reageer nie.
Streeklanddros Retha Pretorius het die saak tot 26 November uitgestel.