ANC eis koppe oor samewerking in Kannaland
Die ANC se provinsiale uitvoerende komitee (PUK) is op die oorlogspad oor voortgesette samewerking van raadslede van die ANC en DA in Kannaland. Die burgemeester van Kannaland, Magdalena Barry en die onderburgemeester, Phil Antonie, word binnekort weer hieroor dissiplinêr deur die ANC aangekla.
Volgens die klagstaat wat die Oudtshoorn Courant hierdie week ontvang het, word hulle verhoor omdat hulle reeds twee briewe van die ANC ontvang het waarin gevra word dat hul moet bedank omdat hulle nie met die provinsiale uitvoerende komitee (PUK) in gesprek wil tree nie.
Die Oudtshoorn Courant het vroeër berig dat die PUK die twee raadslede in Meimaand skriftelik in kennis gestel het dat hulle hul samewerkingsooreenkoms met die twee DA-raadslede onmiddellik moet opsê. Die oorblywende drie setels in die raad behoort aan Icosa.
Jeffrey Donson (Icosa) is na die Augustus 2016 munisipale verkiesing uit die burgemeesterstoel gelig toe die twee DA-raadslede en twee ANC-raadslede ooreengekom het om saam te werk. Die DA en ANC het sedertdien volgehou dat die samewerking tussen die raadslede nie met die goedkeuring van die partye is nie en ‘n koalisie tussen hulle as onwaar afgemaak.
Johanalie Frieslaar-Andrew, ANC voorsitter in Kannaland, het gesê dat die ANC-takke in Kannaland vir Barry en Antonie ondersteun.
“Ons staan bankvas agter hulle. FrieslaarAndrew sê dit is hoog tyd dat die ANC luister na sy takke, en het ‘n beroep op die ANC PUK gedoen om die sinnelose tugverhoor teen Barry en Antonie te staak.
“Daar is geen koalisie tussen die ANC en die DA nie. Dit is net governance. Ons dorp moet reg bestuur word en kan nie weer teruggaan na wanadministrasie en korrupsie nie.”
Ian Avontuur, woordvoerder van Barry, het bevestig dat Barry nie gaan bedank nie, en dat sy haar gaan onderwerp aan die ANC se tugproses.
Volgens Avontuur speel Barry ‘n kardinale rol om Kannalandmunisipaliteit op ‘n nuwe herstelpad te plaas na die vorige bestuur wat van wanadministrasie beskuldig word.
“Haar fokus op skoon en deursigtige regering is ‘n uitstaande kenmerk van haar burgemeesterskap”.
Haar fokus op skoon en deursigtige regering is ‘n uitstaande kenmerk van haar burgemeesterskap