Jeug kan ook uitsien na Leesfees
Die jeugskrywers Anzil Kulsen en Simon Bruinders is vanjaar die genooide gaste vir die afdeling vir hoërskoolleerders van die Prins Albert-leesfees. Daarby stel Elsa Winckler, wat naam gemaak het as romanskrywer, vanjaar haar eerste kinderboek op die fees bekend by ’n optrede vir laerskoolleerders.
Bruinders, ook ’n bekende akteur, is die skrywer van die boek vir volwassenes, Die Sideboard, maar hy het vanjaar sy eerste jeugboek, Die DJ, die lig laat sien. Kulsen se jongste jeugboek is Sôrrie maak nie gesond nie, en Wanneer is eendag? is die titel van Winckler se boek oor feetjies en karakters wat nét deur kinders gesien en gehoor kan word.
Saam met Kulsen en Bruinders gaan die
performance poetry-groep van die digter Gaireyah Fredericks by die ouer leerders optree, asook die rapper Enzo Williams van Prince Albert en sy groep. Fredericks het bekend geword vir haar digbundel
Kaaps is Hollands. Sy is ’n student van die befaamde Diana Ferrus.
Volgens die Leesfees-komitee is die betrokkenheid van die jeug van die dorp en omgewing een van die belangrikste fasette van die sewende Leesfees op die mooi Karoo-dorp. “Om te strewe deurtel e es en skryf” is dan ook die tema van Kulsen en Bruinders se aanbieding Vrydagoggend in die teater The Showroom.
Donderdagmiddag bied Marisca Coetzee van die Leeslaboratorium aan die Universiteit van Stellenbosch vir onderwysers van die Karoo ’n sessie aan met praktiese wenke oor hoe om leerders van passiewe in aktiewe lesers te verander.
Dit word aangebied in samewerking met die Hoërskool Zwartberg.
Anders skrywers
Ander skrywers wat vanjaar hier optree is Deon Meyer, Bettina Wyngaard, Nicol Stassen, Marinda van Zyl, Louise PuntFouché, Julian Jansen, André le Roux, Jeremy Vearey, Karin Cronjé, Petrovna Metelerkamp, Martin Steyn, Jo Nel, Dennis Cruywagen, Tony Ulyatt, Gisela Ulyatt, Clinton du Plessis, Archie Swanson, Jolyn Phillips, Johannes de Villiers, Lukhanyo en Abigail Calata, Chris Marais en Julie du Toit, met oudradioman Dawid van Lill as hoofgespreksleier.
Musiek word verskaf deur Hannes Coetzee en die ghoemadigter Loit Sôls, en die orkeste Hatchetman en Orwellington.
Ander inligting
Om die onderwysersessie (R10 pp) by te woon, skryf aan: christellesmit08@gmail. com
Volledige program en aanlyn kaartjieverkope: Prince Albert Leesfees-App of www.princealbertleesfees.org
Verblyf: www.princealbert.org.za en www.princealbertaccomm.co.za
Besoek Prince Albert Leesfees op Facebook vir inligting en foto’s