AGS Bridgton vereer stigterslede
Die 75 ste bestaansjaarvieringe van die Apostoliese Geloofsending van SuidAfrika (AGS) Bridgton is die afgelope naweek voortgesit met die onthulling van ’n gedenksteen ter erkenning aan die drie stigterslede van die gemeente, wyle Pieter Frans, Jesaja (Abdul) Isaacs en Adam Blaauw.
Volgens Matilda Konnie, dogter van Abdul Isaacs, het haar pa en Pieter Frans destyds vanaf Mosselbaai na Oudtshoorn gekom om werk te soek. Frans en Isaacs het tot bekering gekom en die AGSgemeente is in die Isaacs-woning in St Georgestraat begin. Adam Blaauw het van Prince Albert gekom en hom by die twee baanbrekers aangesluit. Die drie het opelug dienste in ou Bridgton en ook in hul huise begin hou.
“Ek onthou ook dat baie huwelike in ons huis voltrek is,” het Konnie gesê.
Die opelug dienste is later deur die Oudtshoorn-munisipaliteit verbied, maar dit het nie die drie gelowiges gestuit nie. Die gemeenskapsaal in Bridgton, destyds bekend as die “bliksaal” is later bekom vir dienste op Sondae.
Die saal is Saterdae deur die Sewende Dag Adventiste gebruik en Saterdagaande vir danse, waarna dit skoongemaak moes word vir die AGS se erediens Sondagoggende.
Volgens Konnie het nie een van die drie baanbrekers titels agter hul name gehad nie. Hulle het van tyd tot tyd ook groot predikers van stede na Oudtshoorn genooi.
Daar is in 1966 begin met die bou van ‘n kerk in Springbokweg, en die huidige groter kerkgebou in Zebraweg is oor Paasnaweek in 2012 in gebruik geneem.
Die gemeente het Sondagoggend ‘n kort diens in die ou kerkgebou gehou en daarna na die huidige gebou gestap waar die gedenksteen deur pastoor Freddie Cupido onthul is.
Oorkondes is tydens die erediens aan vorige pastore en gemeenteleiers van weleer deur pastoor Freddie Cupido aan dié wat nog leef en familielede van oorledenes oorhandig.
Oudtshoorn-burgemeester, Colan Sylvester, het namens die raad en inwoners van Oudtshoorn die gemeente geluk gewens en gesê die kerkleiers het ten spyte van groot uitdagings, ‘n kerk gebou waarop hulle met reg trots kan wees.