Adjunkbalju wil nou onskuldig pleit

Die saak teen ‘n adjunkbalju van Oudtshoorn, wat vir vonnisverrigtinge tot Dinsdag uitgestel was, het in die Oudtshoorn-landdroshof ‘n nuwe wending geneem toe die hof meegedeel is dat hy sy pleit van skuldig na onskuldig wil verander.

Louwayne Wagenaar se regsverteenwoordiger, Clyde Avontuur, het die hof Dinsdag versoek om die saak uit te stel omdat hy in opdrag van sy kliënt ‘n aansoek ingevolge Art 113 van die Strafproseswet wil bring en Wagenaar dan ook sal getuig. Avontuur het die hof om verskoning gevra vir die versoek, maar bygevoeg dat dit in belang van regspleging en geregtigheid is dat Wagenaar die geleentheid kry om oor die meriete van die saak te getuig. Hy het die hof ook meegedeel dat, indien nodig, hy die hof voor die uitsteldatum sal inlig oor die versoek. Volgens Avontuur was hy aanvanklik nie self betrokke by die saak nie en dat Wagenaar op ‘n laat stadium besluit het om skuldig te pleit. Nadat hy skuldig gepleit het, is hy deur die hof skuldig bevind wat gelei het tot vanoggend se vonnisverrigtinge. Landdros Roelf Konstabel het toegegee dat dit die beskuldigde se reg is en die versoek toegestaan met 26 November as datum vir die aansoek. Dit volg nadat twee ander adjunkbalju’s, Nigel Cupido en Daniël Wagenaar reeds vroeër vanjaar boetes van R8 000 of ses maande gevangenisstraf opgelê is nadat hulle op aanklagte van bedrog skuldig bevind is. Die mans is daarvan aangekla dat hulle dagvaardings afgelewer het, maar dit nie persoonlik aan die betrokke persone beteken het nie.

Die dagvaardings is aan enigiemand by die betrokke adresse, byvoorbeeld ‘n huishulp of sekerheidswag, afgelewer en die handtekening van die persoon wat dit moes ontvang is daarna vervals.