Ladismith-polisie onder bestes in WK
Lede van die Ladismith-polisie het weereens vanjaar gewys dat hulle onder die bestes in die provinsie gereken kan word.
Twee van hulle eenhede is as die eerste- en tweedeplekwenners vir sigbare polisiëring in die Wes-Kaap aangewys. Die aankondiging is tydens die Wes-Kaapse SAPD-toekenningsaand op 27 Oktober gemaak.
Daar is altesaam 16 gebiedskantore in die Wes-Kaap wat ongeveer 150 polisiestasies verteenwoordig.
Die misdaadvoorkomingseenheid onder bevel van kapt. Henry Edwardes het met die eerste plek gespog. Volgens ao. Cederas, woordvoerder van die Ladismithpolisie, het die eenheid ongeveer 1 000 arrestasies gemaak en op die koop toe die meeste dwelmverwante arrestasies in Eden. Die tweede plek is verower deur die C-skof onder bevel van sers. Glanville Barry. As deel van die groot aantal arrestasies wat hulle gemaak het, het hul optrede in Maart waartydens beslag gelê is op 1,4 ton perlemoen van meer as R6 miljoen, uitgestaan.
Ladismith-polisiestasie is verlede jaar as die stasie van die jaar aangewys en hulle bevelvoerder, kol. Jakobus Marthinus is ook as bevelvoerder van die jaar aangewys.