Dysselsdorpkrieketveld in swak toestand
Die toestande waaronder die jong krieketspelers van Dysselsdorp op die oomblik hul krieket speel is skokkend.
Dysselsdorp krieketklub bestaan al vanaf 1982 en het al verskeie SWD spelers opgelewer. Wat egter hartverskeurend is, is dat die klub nie eens oor behoorlike basiese geriewe beskik nie. Die spelers en besoekers moet na die nabygeleë sportstadion stap indien daar dringende behoeftes is. Tans is daar nie eens ‘n boom waaronder die spelers kan skuil teen versengende hitte nie.
Ironies genoeg groei krieket in Dysselsdorp teen ‘n geweldige pas en die klub beskik tans oor byna twee mans krieketspanne en een vrouespan. Ook is hier een van die jong krieketspelers wat aanstaande jaar tydens Junie na Sri Lanka sal toer. Voorwaar uitstekend as in ag geneem word onder watter omstandighede hulle moet oefen en speel.
Die Oudtshoorn Munisipaliteit weet al jare van die gebrek aan geriewe by die krieketveld. ’n Paar jaar gelede is hier ‘n houtstruktuur as kleedkamer opgerig. Die wind het egter die hele struktuur omgewaai. Hierna is nog niks verder weer gedoen nie.
SWD krieket wou so ‘n paar jaar gelede die hele krieketveld opgradeer. Die sokkerspanne speel egter nog op die veld omdat hier te min velde is en SWD krieket het nie voortgegaan nie. By die sportgronde is daar egter baie grond beskikbaar vir addisionele sokkervelde.
Tydens begrotingsvergaderings belowe die munisipaliteit elke jaar dat daar geld beskikbaar is vir opgraderings en ontwikkeling van sportvelde, maar niks gebeur nie.
Die opsigters by Dysselsdorp se krieketveld het nie eens ‘n behoorlike roller tot hul beskikking om die kolfblaaie ordentlik voor te berei nie. Ons praat nie eens van die reeds genoemde patetiese buitevelde nie. Hier gaan iemand nog bitter seerkry met die ongelyke oppervlaktes van die veld.
Ons vra die owerhede om asseblief dringend aandag te skenk aan hierdie aangeleentheid en hulle nie blind te staar teen die toestande hier by Dysselsdorp se velde nie. Die rugbyveld is ook in net so ‘n swak toestand a.g.v. die baie sokkerspanne en té min velde. Dis ‘n skreiende skande dat Oudtshoorn daarop roem dat dit die sportmekka van die Suid Kaap is, maar net ‘n paar kilometer verder is dit die teenoorgestelde.
Kriekerondersteuner, Dysselsdorp