BSS hou sporttoekennings
Bridgton Senior Sekondêr het verlede week hul eerste sport en kultuurtoekenningsaand by Brian’s Grill gehou.
Kelvin Ellis, skoolhoof, het in sy openingstoespraak gesê dat die skool vanjaar ‘n geweldige groot herlewing in baie van sy sportkodes beleef het.
“Ons leerders se prestasies spreek boekdele van die verbintenis wat ons as leerkragte beloof het om ons kinders in hul totaliteit op te voed.
Die sportpersoneel se pogings verdien ook krediet omdat dit gehelp het om die algehele standaard van ons skolesportkompetisies te verhoog. Sport is baie belangrik vir enige skool, want dit leer ons kinders op ‘n jong ouderdom om ‘n nederlaag te aanvaar en om ‘n oorwinning te vier.
Hierdie waardevolle lesse word dan later die boustene van sukses in hul volwasse lewens.”
Volgens Ellis sal die toekennings nou jaarliks gehou word en sal dit ‘n belangrike rol speel in die opbouing van die skool se sportprofiel.
Die leerders wat vanjaar uitsonderlik presteer het en toekenning ontvang het is as volg:
Daetonia de Laan en Benito Hans wat onderskeidelik as sportvrou- en sportman van die jaar aangewys is.
Bridgton se o.17-fietsryspan (Breyton Hendricks, Benito Hans en Waderick Pienaar) is aangewys as die span van die jaar.
Die span se prestasies is as volg: Eindig 1ste in Suid-Afrika met 13 medaljes by die 2018 Jeug Baanfietskampioenskappe. By die 2018 SWD-pad en tydtoetskampioenskappe palm hulle onderskeidelik die 2de, 3de en 4de plekke in. Wen die 2018 SWD Hybrid Liga. Eindig 2de in Suid-Afrika by die SA Skolespan-tydtoets. Al drie fietsryers word ook gekies vir die o.17 SWD-fietsryspan asook die o.17 Wes-Kaapspan.
Breyton Arries is as krieketspeler van die jaar aangekondig.
Bridgton se trompoppiespan van die jaar se spanlede, wat vanjaar as die Champs of Champs by die nasionale trompoppiekampioenskappe gekroon is, is: Naomi Louw, Abi-Rose Coetzee, Camiah Pikaan, Bianca Tarentaal, Lynique Blaauw (trompoppie van die jaar) en Chante Bruintjies.
Leerders wat toekennings ingepalm het in verskillende sportkodes is: Taurique Khan (tafeltennisspeler van die jaar), Zano-lee Jonkers (o.16-rugbyspeler van die jaar), Genevieve Coerecius (netbalspeler van die jaar), Lynique Blaauw (trompoppie van die jaar) en Fabian Martin (sokkerspeler van die jaar).