Union Stars klop Pacaltsdorp
Union Stars het Pacaltsdorp die naweek in ‘n SWD Premierliga wedstryd op die Bridgtonsportterrein naelskraap met een paaltjie geklop. Pacaltsdorp het die loot gewen en besluit om eerste te kolf.
Die wedstryd het laat begin en albei spanne het ooreengekom om slegs 43 boulbeurte te speel in plaas van die normale 50 boulbeurte omdat spel later as gewoonlik begin het.
In Pacaltsdorp se toegelate 43 boulbeurte kon die besoekers daarin slaag om ‘n skaflike 196/9 aan te teken.
Stars se boulers Dillon Nuys (3/39) en Rushaan McGregor (3/26) het uitgeblink met die bal.
In Union Stars se kolfbeurt het die kaptein Pieter Stuurman (63) en Envirino Swartz (43) die beste met die kolf gevaar.
Op ‘n stadium in die wedstryd wou dit lyk of die stryd verlore was vir die tuisspan, maar die laaste paaltjievennootskap van 28 lopies tussen Emile Titus en Dllon Nyus het die wa deur die drif vir Stars getrek.
Stuurman het Nuys geprys vir sy veelsydige bydrae in die wedstryd nadat dié speler ook 27 onoorwonne lopies met die kolf aangeteken het.
Union Stars se volgende wedstryd is Saterdag teen Western Hope op die Bridgtonsportterrein.
In nog twee SWD Premierliga wedstryde die naweek het Harlequins eers vir Pioneers van Plet en daarna Western Hope met onderskeidelik 132 en 136 lopies oordonder.