Basketbalklub soek hulp by munisipaliteit
Die Bridgton-basketbalklub se senior en junior spanne het Vrydag by die Score-sportkompleks op Dysselsdorp as die wenners weggestap na ’n vriendskaplike wedstryd teen Daizys Action-sportklub. Die twee klubs het die wedstryd gereël om kompeterende blootstelling aan hulle spelers te gee.
Volgens Ebenezer Titus, voorsitter van die klub, was die fokus nie soseer op wen teen alle koste nie, maar eerder ’n strategie wat deel is van ‘n groter visie vir die klub.
“Die klub bestaan al sedert 2005, maar het ontbind as gevolg van sommige van die kinders wat betrokke geraak het by bendes en dwelms asook ons basketbalbaan wat erg beskadig en verniel is. Ons hoofdoel is egter om die klub weer as ’n eenheid saam te snoer om sodoende ook die misdaadelement in ons gemeenskap te help beveg.”
“Op die oomblik het ons nie ’n toegeruste baan nie, en gebruik ons tydelike strukture wat ons van my huis af moet dra en dan moet toepak met klippe sodat die kinders kan speel.”
Die Oudsthoorn Courant het vroeër vanjaar ook berig oor die tienjarige Juwayne Adams wie se skedel op twee plekke gekraak is nadat ’n basketbalstruktuur op sy kop geval het.
Die klub se afrigter, Reginald Anthony, sê dit is verblydend dat die ouers steeds volle vertroue in die bestuur plaas om na hul kinders se veiligheid om te sien.
“Ons sukkel al vir die afgelope agt jaar om die Oudtshoorn-munisipaliteit sover te kry om ons baan in stand te hou, maar sonder enige sukses.”
Die oprigting en instandhouding van nuwe veilige basketbalstrukture, borgskappe vir spanuitrustings en affiliasie met Edenbasketbal is van die hoof uitdagings wat Bridgton-basketbalklub tans kortwiek om sy visie te laat realiseer.
By navraag het Lluwellyn Coetzee van strategiese dienste by die Oudtshoornmunisipaliteit gesê, die munisipaliteit het in die verlede ’n volledig-toegeruste baan beskikbaar gestel, maar dat dit deur vandale vernietig is.
“Ons is tans besig om daadwerklik na binnenshuise opsies te kyk sodat ons basketbal as volwaardige sport in Oudtshoorn kan akkommodeer.”
Coetzee het ook die bestuur van Bridgtonbasketbalkub aangeraai om met Ian Loubscher (sport en rekreasie) in verbinding te tree as hulle die De Jager-sportkompleks wil gebruik om wedstryde aan te bied.
“Die munisipaliteit sal selfs bereid wees om die kostes te dek solank dit net vooraf gereël word.”