Hof aanvaar jong man se pleitooreenkoms
‘n Jong man van Oudtshoorn, wie se vrylating ingetrek is toe hy weer misdaad gepleeg het, het Dinsdag ‘n pleitooreenkoms met die staat aangegaan. Die saak is in die Oudtshoorn-streekhof vir vonnisverrigtinge tot volgende maand uitgestel.
Die 18-jarige Francois van der Bergh het tereggestaan op aanklagte van poging tot moord, besit van gevaarlike wapens, opsetlike saakbeskadiging en roof met verswarende omstandighede.
Hy het op die aanklag van poging tot moord onskuldig gepleit, maar wel skuldig op ‘n alternatiewe klag van aanranding met die doel om ernstig te beseer en skuldig op al die ander aanklagte wat so deur die staat aanvaar is.
Van der Bergh erken dat hy op 29 September 2017 in Victoriastraat die 19-jarige Bertus Cronjé herhaaldelik met ‘n mes gesteek het, dat hy in besit was van twee messe van onderskeidelik 15 cm en 17 cm lank, die vensters van die woning van Patrick Maklumba in Randstraat stukkend gegooi en skade van R130 aangerig het. Hy het ook skuldig gepleit op die aanklag van roof met verswarende omstandighede deur vir Enrico le Roux in Voortrekkerweg met ‘n skêr te steek en van sy selfoon te beroof.
Streeklanddros Neels Nortje het die saak gister vir ‘n proefbeampte- en voorvonnisverslag tot 10 Desember uitgestel. Die uitstel is gegee in gevolge die kindergeregtigheidswet omdat Van der Bergh jonger as 18 jaar oud was met die pleging van sommige van die misdade.
Corné Pretorius is die aanklaer en Gideon Badenhorst verskyn namens die beskuldigde.