Polisie verbind tot plaasveiligheid
Die nasionale kommissaris van polisie, gen. Khehla Sitole, het hom dié week daartoe verbind dat die polisie sal help om boere en boerdery-gemeenskappe te beveilig.
Sitole het Maandag die vergadering van Agri SA se Landelike Beveiligingskomitee bygewoon.
“Agri SA is bemoedig en het waardering vir die nasionale kommissaris se entoesiasme om landelike gebiede veiliger te maak en dat die polisie sáám met Agri SA wil werk,” sê Tommie Esterhuyse, nuutverkose voorsitter van
Agri SA se Sentrum van Uitnemendheid: Landelike Veiligheid.
Volgens Esterhuyse verwelkom Agri SA ook die uitnodiging van die kommissaris om die Landelike Beveiligingstrategie saam met die polisie te finaliseer en gedurende 2019 die strategie gesamentlik bekend te stel. Agri SA sal as vennoot van die SAPD met die bewusmaking van die hersiene strategie optree.
Tydens die vergadering het Sitole die polisie se omdraaistrategie, met landelike veiligheid as een van die fokusareas in die strategie, met die komitee bespreek. Volgens Sitole is dit sy eie en die polisie se strewe om teen 2030 “’n veiliger landelike omgewing te skep deur hul grondwetlike verantwoordelikhede na te kom”.
Hy het gesê die polisie wil met verbeterde polisiëring tot die ekonomiese ontwikkeling in landelike gebiede bydra, sodat die boerderygemeenskap kan voortgaan met sy belangrike bydrae tot die ekonomie, voedselsekerheid en stabiliteit in Suid-Afrika. Die implementering van ‘n doeltreffende reservistestelsel, die herlewing van landelike spesialiseenhede en die voorsiening van die nodige hulpbronne aan landelike polisiestasies word ook by die omdraaistrategie ingesluit.
“Die goeie samewerking tussen Agri SA en die polisie oor jare heen is herbevestig en op ‘n hoër vlak geplaas deur die besoek van die topbestuur van die polisie en die onderneming van die nouer samewerking,” sê Esterhuyse.
Laubscher Coetzee, Agri Klein Karoo se verteenwoordiger by Agri WesKaap, het die aankondiging verwelkom. “Plaasveiligheid is ons almal se bekommernis en dit is bemoedigend dat gen. Sitole hom daartoe verbind om dié groeiende probleem aan te spreek.”