Bekende sakeman uiteindelik tronk toe
Een van die mede-eienaars van die gesogte Kammanassie Bluewynlandgoed en wildreservaat naby De Rust, gaan hierdie Kersfees, en ‘n hele paar volgendes, in die tronk vier nadat al sy pogings misluk het om sy vonnis van vyftien jaar vir korrupsie en geldwassery vry te spring.
Alfeus Christo Scholtz (58) van Mooikloof in Pretoria is reeds twee jaar gelede in die NoordKaapse hooggeregshof saam met John Block, voormalige Noord-Kaapse ANC-voorsitter, skuldig bevind en gevonnis. Dit spruit uit huurooreenkomste wat gesluit is tussen provinsiale regeringsdepartemente en die Trifecta-maatskappygroep waarvan Scholtz ’n direkteur is.
Block en Scholtz het die afgelope jare alles in hul vermoë gedoen om tronkstraf vry te spring deur herhaalde appèlaansoeke. Die konstitusionele hof in Johannesburg het egter pas hul laaste poging gestuit toe regter Mogoeng Mogoeng en nege ander regters Maandag die twee mans se aansoek tot appèl teen hul skuldigbevinding en vonnis verwerp het “omdat dit geen vooruitsig op sukses het nie”.
Die appèlhof in Bloemfontein het in Augustus tot dieselfde slotsom gekom, waarna die duo hulle tot die konstitusionele hof gewend het.
Dis ’n saak wat jare lank ondersoek is nadat Magdalena Buizer, ‘n boekhouer by Tirfecta, in 2011 die fluitjie geblaas het oor onreëlmatige ooreenkomste en transaksies tussen Trifecta en sekere regeringsdepartemente. Buizer is uiteindelik in ’n getuiebeskermingsprogram opgeneem. Bedrae van by die R700 miljoen word genoem. Luidens hofstukke het Block sy invloed tussen 2006 en 2008 in die ANC gebruik om vir hom ’n eiendomsakeryk op te bou. Hy het dit gedoen deur transaksies tussen Trifecta
Holdings en regeringsdepartemente te bewerkstellig, en is dan geldelik vir sy rol beloon.
Scholtz se regsverteenwoordigers het aangevoer dat hul kliënt ’n eerste oortreder is en nog altyd graag voorheen benadeeldes in die gemeenskap wou help. Sy vrou, Elmarie, is in 2013 aan veelvuldige sklerose dood en sy seun, Christiaan (23) in 2014 in ’n motorongeluk.
De Rust is een van Scholtz se voorkeur-kuierplekke het ingeligte bronne van dié dorp en die Kammanassie-landgoed aan Oudtshoorn Courant vertel. Hy het in 2008 mede-eienaar van Kammanassie geword. “Christo Scholtz is joviaal, gewild en almal se pel, tog is almal bang vir hom,” het die bron gesê. Volgens die bron het Scholtz ook ‘n kerkgemeente by sy huis in Mooikloof gestig wat glo bestaan uit ‘n groep wat van die NG Kerk Moreletapark afgestig het. “Hy het glo onlangs nog vir sy gemeentelede gevra om vir hom te bid om hulp in die hofsake.”