Tabakboere ontvang erkenning vir oes
Tabakprodusente uit die Oos- en WesKaap wat vanjaar die beste presteer het, is Vrydagaand by Berluda Gasteplaas op Schoemanshoek vereer. Universal Leaf South Africa (ULSA) se 100ste bestaansjaar is ook gevier. John Schoeman is aangewys as die beste produsent van die jaar.
“Die toekenning is gebaseer op omset per hektaar, die voldoende navolging van die produksieprogram en aktiewe deelname aan die bedryf,” verduidelik Janno Koen, agronoom van ULSA.
Die Lood Lötter Familietrust van Pearston in die Oos-Kaap het die toekenning ontvang vir die beste beplanning ten opsigte van die kwota teenoor werklike lewering (100%).
Die Middelplaas Trust (Piet Schoeman, bestuurder Henko Schoeman,) is aangewys as die produsent wat die beste verbetering (48%) getoon het.
Die beste produsente in drie kategorieë, wat gebaseer is op die omset per hektaar wat hulle gelewer het, het erkenning ontvang.
Hulle is: Kategorie1: 0 - 10 000 kg
1: Deon Ferreira van Cormic Trust van Patensie in die Oos-Kaap 2:Jerry Strydom 3: Vonnie Barnard
Kategorie 2: 10 000 - 20 000 kg
1: Riaan Terblanche 2: John Schoeman 3: Christoffel Spies
Kategorie 3: 20 000 kg>
1: Tiekie Smith 2: Piet Schoeman (bestuurder Henko Schoeman)
3: Hugo Nel
Flip Nel, wat die afgelope 50 jaar ononderbroke tabak in die Klein-Karoo verbou, het ‘n spesiale toekenning ontvang. “Die geheim van tabakboerdery is om nooit kwaliteit in te boet nie. Die tabakbedryf was nog altyd bestendig en ek het deur die jare daarin bly glo.”
Die drie beste produsente, Riaan Terblanche, John Schoeman en Henko Schoeman, bestuurder van
Piet Schoeman se Middelplaas Trust, het Timac Agro SA, vervaardiger en verspreider van nuwe-generasie spesialiteit plantvoedingsprodukte, se toekennings vir uitnemendheid ontvang.
“Dit was een van die moeilikste groeiseisoene in die Klein-Karoo en die Oos-Kaap, maar ten spyte daarvan was die oes baie mooi,” sê Chris Botha, verbonde aan Timac Agro SA en voorsitter van die tabakklub.
Volgens hom is die tabakklub gestig met die doel om uitnemendheid in die tabakbedryf te bevorder. “Die tabakbedryf is besig om te spesialiseer in ‘n nismark; dis hoekom hulle tabak van uitstekende kwaliteit kan lewer ten spyte van bitter moeilike omstandighede.”
Louis Strauss van Philip Morris, die grootste aankoper van oonddroogtabak ter wêreld, het ook die geselligheid bygewoon.
Strauss het beklemtoon dat onwettige verspreiding van tabakprodukte en veral sigarette van swak kwaliteit, die tabakbedryf knou.
Kontak Janno Koen by 082 703 2470 of Chris Botha by 084 250 2483 vir meer inligting oor tabakproduksie.
“Die tabakbedryf is besig om te spesialiseer in ‘n nismark; dis hoekom hulle tabak van uitstekende kwaliteit kan lewer ten spyte van
bitter moeilike omstandighede.”