Skietdag naby De Rust
Die Suid-Kaap Jagters- en Bewaringsvereniging (SJB) het behoorlik die skote laat klap tydens hul gewilde ghonguitdaging
Die kompetisie het Saterdag, 17 November op die plaas Aangenaam van Henry van der Westhuizen in die De Rust-omgewing plaasgevind. Die dag se skiet is gekenmerk deur gunstige weersomstandighede. Daar was 116 inskrywings en die ouderdomme het gewissel van skoliere tot naby 80. Die kompetisie het in spanverband plaasgevind met vier skuts per span.
Die goeie baanuitleg, toewyding van die baanoffisiere en tellinghouers het bygedra tot die sukses van die dag.
Deelnemers het na staalplate oor afstande vanaf 180 tot 390 meter, geskiet.
Stretch Esterhuizen het ‘n 25.06 jaggeweer ter waarde van R12 800 wat deur Kloppers geskenk is, in ‘n gelukstrekking gewen.
Ander pryse wat deur klein Karoo Agri geskenk is, het teleskope ingesluit. Die kompetisie het uit ses bane bestaan met vyf ghonge per baan.
Die uitleg van die bane en skietposisies het werklike toestande in die veld waarmee jagters te doen kry, uitgebeeld.
Die wenspanne was:
Eerste: Ghong Busters - Jacques du Plooy, Junita van Zyl, Leras van Zyl en Raynor Becker.
Tweede: Hou ons dop - Renier van Greunen, Freek Zeelie, Hugo Moolman en Fermi Meyer
Derde: Span 6.5 - Niel Basson, Hugh Ives, Gert van Wyk en Francois Botes.
Die SJB-bestuur het alle borge te bedank vir hulle bydrae om skietsport in die Suid-Kaap lewendig te hou. Die borge sluit in Kloppers, ATKV, Klein Karoo Agri, verskeie anonieme skenkers en Henry en Martie van der Westhuizen vir hulle gasvryheid en die bystand wat gelewer was met die uitleg van die bane.
Die skietdag is afgesluit met ‘n lekker saam-kuier in die stoor van Aangenaam, waar ‘n ete voorgesit is.