Bestmed-straatmylreeks bekendgestel
Die 2018 Bestmed-straatmylreeks is Woensdag 14 November tydens ‘n glansryke geleentheid by Na Donker Restaurant in Hartenbos bekendgestel.
Die reeks wat oor drie bene strek, begin op 17 Desember in Oudtshoorn as die Klein Karoo Bestmed-straatmyl met ‘n straatmyl, atletiek en fietsry.
Dit word op 19 Desember by die NMU in George voortgesit met bergfietsry, ‘n straatmyl en staproetes in die Outeniquaberge se wandelpaaie. Op 21 Desember vind die ATKV Hartenbos se straatmyl plaas, met nog verskeie items, wat ook sport op die strand insluit.
By die opening het Karen Phipson (ATKV Hartenbos se hoof van bemarking) Bestmed bedank vir hul bydrae tot die sukses van die straatmylreeks. “As dit nie Bestmed was nie, sou hierdie reeks nie ‘n sukses gewees het nie,” het sy aan Wicus Kotzé, Bestmed se bestuurder gesondheidsorg, gesê.
Phipson het die klem daarop gelê dat mens moet belê in opkomende sportlui se toekoms. “Ons is opgewonde oor vanjaar se straatmylreeks.”
“Ons wil ‘n verandering maak deur sport,” het Hugo Loubser namens NMU gesê.
Eden sport- en rekreasie se waarnemende kantoorhoof, Jean Neethling, het dit as ‘n voorreg beskryf om in die straatmylreeks te belê. Hy het die inisieerder van die reeks, Hans van der Veen gesalueer vir dit wat hy vermag het.
Van der Veen, ‘n bestuurslid van die Klein-Karooatletiekfonds (KKAF) het op sy beurt gesê: “Almal van ons wat hier staan glo in die mag van transformasie van ons volk. Hier is iets ongeloofliks besig om plaas te vind.
“Ons het ‘n keuse. Of ons stap weg van die lewe se uitdagings of raak deel van dié wat ‘n verskil wil maak,” was sy woorde aan die gaste.
Kotzé het die versekering gegee dat Bestmed deel geraak het van die straatmylreeks uit die liefde vir die saak. “Ons doen dit vir die mense en is trots om deel daarvan te wees. Dit is belangrik dat mense belê in die jeug se toekoms.” Kotzé het gesê Bestmed is opgewonde oor die beplannings vir die 2018-Bestmedstraatmylreeks.” LJ van Zyl, Olimpiese atleet en Bestmed-ambassadeur vir die reeks, het ook die geleentheid bygewoon. Hy het die atlete en organiseerders sterkte toegewens. “Hierdie straatmylreeks is die ideale geleentheid om jou fiksheid te toets.”
Vir meer inligting, besoek www.edenmiles. co.za