Union Stars looi Western Hope
Twee van Oudtshoorn se oudtse krieketklubs, Western Hope en Union Stars, het Saterdag op die Bridgton-sportterrein in ‘n SWD Premierliga derbywedstryd kragte gemeet. Albei klubs bestaan reeds meer as ‘n eeu lank.
Die wedstryd het om 10:00 in ideale koel weerstoestande plaasgevind. Western Hope het die loot gewen en besluit om eerste te kolf waarna hulle vir ’n skamele 87 lopies uitgeboender is. Slegs Charles Willemse met 32 lopies, kon enigsins hond haaraf maak.
Union Stars se snelbouler, Herchelle America, se blitsige aflewerings het die kolwers behoorlik laat bontstaan. Hy het uiteindelik met 4 paaltjies vir 23 lopies in 10 boulbeurte geëindig.
Union Stars het in hul kolfbeurt die wenteiken reeds in die 20ste boulbeurt bereik vir die verlies van 7 paaltjies en sodoende die wedstryd met 4 paaltjies gewen. Dit het aan hulle n bonuspunt besorg het.
Die kaptein, Pieter Stuurman, was onoorwonne voor die penne met 32* lopies toe die wenlopies geslaan is.
Western Hope se bouler Damian Esau kon ondanks die groot loesing steeds vier paaltjies inpalm. Die afgelope vyf jaar het Union Stars en Western Hope al in tien SWD Premierliga wed-stryde teen mekaar kragte gemeet, met Union Stars wat nog elke keer aan die wenkant was.
Volgens Flip Goliath , sekretaris van Western
Hope, fokus die klub meestal op ontwikkeling.
“Meeste van ons spelers verlaat die klub vir groener weivelde elders nadat ons hulle ontwikkel het. “Alhoewel ons spelers tans nog baie jonk is, beskik die klub oor ongelooflike talent.
“Spelers soos die middelorde kolwer Charlton Willemse en die veelsydige speler Mehego September vorm die kern van die span en moet beslis in die toekoms dop gehou word.
“Dit is nog relatief vroeg in die seisoen, en ons doelwit is om volgende jaar in die Top 6 in die SWD Premierliga te eindig,” het Goliath gesê. Plaaslike krieketliefhebbers kan uitsien na die volgende derby tussen dié twee legendariese spanne wat volgende jaar op 2 Februarie sal plaasvind.
Union Stars se volgende wedstryd is Saterdag teen Nelson Mandela Universiteit op George, terwyl Western Hope teen Pioneers van Plettenbergbaai op die 25ste November sal kragte meet.