Nuwe akademie vir Oudtshoorn
Die Oudtshoorn-munisipaliteit gaan hande met Kunste Onbeperk vat om 'n Kuns en Kultuurakademie in Oudtshoorn te stig.
Volgens Lluwellyn Coetzee, senior bestuurder van strategiese dienste, het die uitvoerende burgemeesterskomitee die verslag die week voorgelê en vorm dit deel van die Visie 2030-strategie.
Dit sal volgende week voor die munisipale raad vir finale goedkeuring dien.
"Die Visie 2030-strategie het ten doen om die ekonomie in die dorp te stimuleer en om volhoubare werksgeleenthede te skep," aldus Coetzee.
Colan Sylvester, burgemeester van die Oudtshoorn-munisipaliteit, het gesê dat só 'n fasiliteit lankal in Oudtshoorn gestig moes word.
"Deel van ons Visie 2030-strategie is om die Groter Oudtshoorn in 'n opvoedkundehub te omskep waar daar verskeie opleidingsinstelling sal wees. Die kuns en kultuur-akademie komplimenteer dus ons plan," het Sylvester gesê.
Volgens Ntobeko Mangqwengqwe, senior munisipale woordvoerder, het Kunste Onbeperk reeds in 2011 die plan aan die raad voorgelê en wou hulle die Toekomsrus-gemeenskapsaal as opleidingsfasiliteit vir kuns en kultuur gebruik.
Volgens hom gaan daar 'n memorandum van verstandhouding tussen die twee partye onderteken word.
"Die munisipaliteit is ook besig met 'n omvangstudie om verdere ontwikkeling van die sentrum te beplan. Langs die gemeenskapsaal in 'n oop spasie, wat ook as die Kloof bekend staan, wat in 'n opelugteater omskep kan word en daar is ook moontlikhede vir sport- en rekreasie-aktiwiteite. Die ontwikkeling van die sentrum sal ook 'n inheemse tuin met paadjies en sitplekke insluit. Die omvangbepalingstudie het ook die funksionering van die nuutgeboude BMX-baan uitgelig as deel van die ontwikkeling van sportinfrastruktuur by die sentrum," het Mangqwengqwe gesê.
Die Wes-Kaapse minister van sport en kultuur, Anroux Marais, het ook beloof om geld vir die projek te gee.