Klein Karoo Groep vaar goed ten spyte van uitdagings
Klein Karoo (Edms.)
Bpk. en sy drie filiaalmaatskappye Klein Karoo Saadproduksie (KKSP), Klein Karoo International (KKI) en Klein Karoo Agri (KKA) het die jaar op ‘n hoë noot afgesluit.
“Die Klein Karoo Groep se omset het met 0,8% van R1 579 miljard tot R1 591 miljard gestyg,” het Johan Schoeman, hoofuitvoerende beampte van Klein Karoo (Edms.) Bpk. tydens die Klein Karoo Groep se algemene jaarvergadering bekend gemaak. Die netto wins na belasting toeskryfbaar aan aandeelhouers het R58,6 miljoen beloop.
Die filiaalmaatskappye het onder uitdagende omstandighede goed presteer.
“Klein Karoo Saadproduksie het weer ‘n rekordjaar beleef en die hoogste omset nog behaal,” het David Malan, besturende direkteur van KKSP gesê. Dit ten spyte van die droogte, die swak R/$-wisselkoers en politieke onrus in Noord-Afrika en die Midde-Ooste, wat saadaankope gestriem het. Die droogte het daartoe gelei dat die oppervlakte onder saadproduksie ‘n laagtepunt bereik het.
KKSP se omset het tot ‘n rekord van R292 miljoen gestyg. Dit is 6% beter as die vorige jaar en 15% beter as die begroting. Die bruto wins uit bedryfsaktiwiteite is 23% beter as die vorige jaar. Die netto wins voor belasting het met 2,6% gekrimp, maar dit was steeds 58% beter as die begrote netto wins, aangesien die kleiner oppervlakte reeds in die begroting in ag geneem is. Uitbetaling aan produsente was as gevolg van die kleiner oppervlakte en die droogte 24% laer as verlede jaar.
“Klein Karoo Agri het ‘n baie uitdagende finansiële jaar agter die rug, maar KKA het ten spyte van moeilike omstandighede bo verwagting goed presteer,” het Terblanche du Plessis, besturende direkteur van KKA gesê. KKA het 2018 afgesluit met ‘n omsetsyfer van R594 miljoen (2017: R557 miljoen), (2016: R476 miljoen).
Klein Karoo International (KKI) se omset het R710 miljoen beloop en die netto wins na belasting toeskryfbaar aan aandeelhouers was R23,2 miljoen. “Die beskikbare slagvolstruisgetalle het vir die soveelste opeenvolgende jaar weereens ‘n daling getoon,” het Schoeman, wat ook uitvoerende beampte van KKI is, gesê.
“Die bedryf en produsente sal op ‘n verantwoordelike wyse moet toesien dat die styging in hierdie getalle binne hanteerbare vlakke bly ten einde te voorkom dat voorraadvlakke te vinnig styg en pryse negatief beïnvloed.” Daar is ‘n opflikkering in die leermark, en die veremark doen uitstekend.
Weens Avian Influenza (AI) kon geen vars volstruisvleis in 2018 uitgevoer word nie, en sedert ‘n residu-krisis in Maart kon ook geen gaar vleis uitgevoer word nie. Dit behoort teen middel-Desember bekend te wees of volstruisvleis weer na Europese Unie-lande uitgevoer mag word.
Die beoogde eenwordingsproses tussen KKI en Mosstrich, waarmee in Januarie vanjaar begin is, is tans by die mededingingskommissie. Die uitslag behoort ook teen middel-Desember bekend te wees. Francois de Wet, voorheen uitvoerende beampte by Mosstrich, is aangewys as die uitvoerende beampte van die nuwe maatskappy CapeKaroo International (CKI), indien die mededingingskommissie die samesmelting toelaat.