Fortuin lig sluier oor planne met SWD-rugby
“Ons wil SWD weer ‘n krag in SuidAfrikaanse rugby maak. Dus die versugting van die oud-Springbok Bevin Fortuin en ‘n groep plaaslike sakelui, wat agter die skerms druk besig is met planne om die unie finansieel te ondersteun.
Fortuin, ‘n boorling van Blanco wat onder andere vir die Bokke en die Cheetahs op heelagter uitgedraf het, het in ‘n openhartige onderhoud met die George Herald die sluier effens gelig oor dié ambisieuse planne om ‘n “reddingsboei” na die sukkelende SWD uit te gooi.
Die SWD Arende is, soos talle van die ander kleiner rugbyunies wat in die Curriebeker se Eersteliga meeding, onder kwaai finansiële druk en hy moes noodgedwonge al die kontrakte met sy spelers en die afrigtingkorps op 31 Oktober beëindig.
Dit bedreig die beroepstatus van die unie en dis wat Fortuin en sy weldoeners ten alle koste wil probeer verhoed.
Onderhandelinge, sê Fortuin, is in dié stadium in ‘n uiters sensitiewe stadium en voordat almal nie hand op papier gesit het nie, is sy mond gesnoer. “Val iets uit die bus of onttrek een van die potensiële borge, sit ek met eier op my gesig. Kyk net wat het verlede jaar van die gewese Bok-afrigter Heyneke Meyer se groot planne met die SWD geword. Daar het dadels van gekom.
“Wat ek wel kan noem, is dat die kontrak wat ons aan die unie sowel as die SuidAfrikaanse rugbyunie (Saru) en die ander betrokkenes wil voorlê, by ons regsmense lê. Dié kontrak sal, as daar nie iets voorval nie, reeds aanstaande week aan al die betrokke partye oorhandig word. Hier is dit reeds op my selfoon.”
Fortuin sê drie vennote het hul reeds “verbind” om geld in die unie te belê en dit beloop alreeds ‘n aardige bedrag. “Ek is tans ook besig om met ‘n klereborg te onderhandel. As alles klopdisselboom verloop, kan ons binne ‘n week, dalk twee, name en getalle bekend maak.”
Fortuin sê die idee om weer by die SWDrugbyunie betrokke te raak, het posgevat kort nádat hy in Januarie vanjaar na George teruggekeer het ná sy tyd as ‘n hulpafrigter by die Blou Bulle saam met Anton Leonard. “Ek het losweg met ‘n vriend gesels oor die moontlikheid om dalk aandele in die SWD te bekom. Net daar is ‘n saadjie geplant. Ek het met ‘n paar plaaslike sakemanne begin gesels en uiteraard ook met die unie, wat baie ontvanklik was vir dié idee.
Hennie Baartman, president van die SWD, sowel as bestuurslede van al die plaaslike rugbyklubs in die SWD, is op ‘n vergadering oor die planne ingelig en daar wees geen teenkanting nie. “Trouens, almal was positief daaroor, want hulle sien die groter prentjie en besef alle vorme van rugby in die SWD, klubrugby ingesluit, sal net gedy as die aanbod aanvaar word en die planne kom goed op dreef.
“Ek is nie hier om die SWD te kaap of om te onderhandel oor ‘n toppos nie. Ek en my vennote wil saamspan en die SWD help om sy volwaardige plek in beroepsrugby in SuidAfrika in te neem. Die SWD moet weer een van die ses grotes in SA rugby word.”
“Juis daarom is ek gesteld daarop om plaaslike sakelui aan boord te kry. Dis vir my ononderhandelbaar. Ek is hier gebore en dis hier waar ek my eerste rugbytreë gegee het. Nou wil ek, met die hulp van plaaslike mense, groot treë gee om die SWD te help om sy beroepstatus te behou, dit te beveilig en dan, in die toekoms, dit na die hoogste moontlike vlak te voer. Oornag gaan dit nie gebeur nie, maar hoekom kan mens nie nou al droom van die SWD wat weer in die Curriebeker se Premierliga meeding nie. En dan, wie weet, in die Superrugby-reeks uitdraf nie?”
Maar, sê Fortuin, dinge sal van meet af aan reg gedoen moet word. “Hier lê ‘n harde, steil pad vorentoe. As die SWD Arende weer op hoogste vlak wil meeding, sal nie net ‘n goeie groep gekontrakteerde spelers genoeg wees nie.
“Outeniquapark, byvoorbeeld, die tuiste van SWD-rugby, sal deeglik opgeknap moet word. In sy huidige gedaante lyk die ikoniese stadion moeg en sal dit die aanbied van groot rugbytoernooie kelder. Daar is juis sprake daarvan dat daar ernstig gekyk word daarna om in 2019 ‘n nasionale o.19toernooi hier aan te bied. Hier is mos ‘n gulde geleentheid vir ons plaaslike owerhede en sakelui om betrokke te raak en ons inisiatief te ondersteun...”