Burgemeestergholfdag genereeer R109 000
Die jaarlikse Burgemeesters-gholfdag is Saterdag deur Frans Coetzee en Lawrence Boer met ’n telling van 85 gewen.
Albei gholfspelers het van Plettenbergbaai gereis om aan dié gewilde gholfdag deel te neem en het elkeen met ’n halwe lam ter waarde van R1 400 weggestap.
In die tweede plek was Jacobus Arries en Patrick Wagenaar met 79 punte, gevolg deur John Bruiners en Melvin Harold wat in die derde plek met 78 punte geëindig het.
Die langste dryf vir mans was deur Pieter du Plessis op die sesde putjie, en vir dames deur Chloè Malgas-Kelpin.
Dit was die tweede jaar wat die Burgemeesters-gholfdag aangebied is.
Vanjaar het 92 spelers deelgeneem en die inskrywingsfooi was R180 per persoon wat ’n heerlike braaiete ingesluit het.
Die doel van hierdie inisiatief was om die munisipale beursfonds ’n hupstoot te gee wat minderbevoorregte jongmense van Oudtshoorn, Dysselsdorp en De Rust in staat sal stel om verder aan tersiêre inrigtings te kan studeer.
Volgens Colan Sylvester, burgemeester van die Oudtshoorn-munisipaliteit, was die gholfdag baie suksesvol en het hulle R109 000 ingesamel. “Daar is net een manier hoe ‘n dorp nog verder kan ontwikkel, en dit is om die geletterdheidsvlakke van die jeug te verhoog.
“Ons almal het drome, maar nie almal het die hulpbronne om dit te verwesenlik nie. Namens die Oudtshoorn-munisipaliteit wil ek die Oudtshoorn-gholfklub, ons borge en die spelers wat ingeskryf het hartlik bedank.
“Dit is te danke aan julle dat ons ‘n helpende hand na die gemeenskap kan uitreik.”
Paul Stroebel, Oudtshoorn-gholfklub se kaptein, het tydens sy spreekbeurt ook daarop gedui dat die gholfbaan ondanks die droogte in ‘n uitstekende toestand was.
“Tans gebruik ons gesuiwerde rioolwater om die grasperke nat te lei teen ‘n baie lae tarief, en in hierdie verband wil ek ook namens die Oudtshoorn-gholfklub die munisipale raad bedank vir hierdie vergunning.”
Sylvester het ook tydens hierdie geleentheid erelidmaatskap van die Oudtshoorngholfklub ontvang.