Plaaslike fietsryklubs voltooi Coronation DC-wedren
“Ons het nou wel ‘n paar klein ongelukkies, pap wiele en los speke op ons pad gehad, maar ons is almal heel en veilig tuis.”
So sê Jaco von Molendorff, spanlid van die Oudtshoornfietsryklub na afloop van Saterdag se Coronation Double Century in Swellendam. Hulle het saam met die Dulux-fietsryspan aan die kompetisie deelgeneem.
Hierdie wedren is oor 202 km beslis en 250 fietsryklubs van oor Suid-Afrika het vanjaar ingeskryf.
Volgens Jaco kon al die spanlede die moordende wedren in sewe uur, 17 minute en 16 sekondes voltooi - en dit is iets waarop hulle baie trots is.
“Ons volgende doelwit is om nou te begin oefen vir die Wes-Kaapse kampioenskappe in Januarie. Enige persoon wat by die klub wil aansluit kan my e-pos by ourbookkeeper@scwireless. co.za. Met ontvangs sal ek dan die registrasievorm aanstuur.”
Volgens Louis Visser, spanlid van die Dulux-fietsryspan, het al hul spanlede met ‘n rouband gery om hulde te bring aan Louis Lategan wat verlede jaar deel van hul span was.
“Hy was die hele roete lank in ons gedagtes. Dit was ‘n moeilike dag met ‘n gebreekte ketting en vier pap wiele, maar die span het hulle nie laat afsit deur die teëspoed nie. Ons kon ook daarin slaag om Saterdag die Coronation Double Century as ‘n span in ‘n tyd van sewe uur, 16 minute en 14 sekondes saam te voltooi - slegs drie minute stadiger as verlede jaar.”
Hy sê die hoogtepunt van hul dag was om as span klaar te maak en die Charles Milnermedalje in ontvangs te neem.
“Die beskrywing op die medalje is vir die span ook baie simbolies omdat dit sê Celebrating team spirit,” het Visser
bygevoeg.